DR saqqummiussivoq: Dommerit Leonora ajugaatippaat
Julie aamma Nina isiginnaartunit nuannarineqarnerpaapput. Qallunaalli Melodi Grand Prixianni dommerit taasinerminni Leonora Eurovisionimut ingerlateqqippaat.
DR saqqummiussivoq 20-nik ukiulik Leonora qallunaat Melodi Grand Prixianni 2019-imi erinarsuummik ‘Love is Forever’-imik atuinermini qanoq ililluni ajugaanersoq.
Dr.dk taama allappoq.
Leonora aamma Julie aamma Ninap taajuunneqarneranni 7 procentpointiinnarmik nikingasoqarpoq. Ajugaaniutivinnermilu erinarsuutit pingasut taajuunneqarnerat pissanganarluinnarsimasoq, dr.dk allappoq.
Kisitsisit takutippaat isiginnaartut Julie Berthelsen aamma Nina Kreutzmann Jørgensenip ‘League of Light’-imik erinarsornerat ajugaatinneqartumiit, Leonoramiit nuannarinerugaat. Kinali Eurovisionimut, Jerusalemimi ingerlanneqartussamut, ingerlaqqissanersoq isiginnaartut kisimik aalajangersinnaanngilaat.
Unamminermi dommeriutinneqartut naliliinerat aamma pingaaruteqarpoq.
- Tassa taamaappoq isiginnaartut dommerillu naliliitinneqaraangata. Ukiut ilaanni isumaqatigiittarput, ukiunili allani isumaqatigiissanatik, DR-imi aliikkusersuinermut pisortaq, Jan Lagermand Lundme dr.dk-mut oqarpoq.
Isiginnaartunit taajuunneqarnerpaapput
Unamminerup kingorna isiginnaartut arlallit naammagittaalliorput, taasinerup nalaani taasinertik atorsimanngitsoq nalunaarutigalugu. Tassungali nassuiaatissartaqarpoq.
Julie aamma Nina isiginnaartunit nuannarineqarnerpaapput. Isiginnaartut taasisut 23 procentiisa Julie aamma Nina taasimavaat, unamminermili ajugaasoq Leonora isiginnaartut 18 procentiinit taaneqarsimalluni, dr.dk allappoq.
Unamminermili dommerit erinarsuut asanninnermut tunngasoq ‘Love is Forever’ nuannarinerusimavaat, dommerillu taasineranni 24 procentinit taaneqarluni. Julie aamma Nina dommerit taasinerannit 12 procentinit taaneqarpoq. Qallunaallu Melodi Grand Prixianni ajugaaniutivinnermut annguttoq pingajuat, Sigmund, dommerit taasinerani Julie aamma Ninamit taajuunneqarnerusimagaluarpoq.
- Dommereqartitsinerput isertuutinngilarput, taakku taasinerat inernerusut affaattut naleqarpoq, isiginnaartullu taasinerat aamma inernerup affaattut naleqarluni. Eurovisionimi aamma dommereqarput, tassanilu taama isiorneq ingerlalluartarpoq, Jan Lagermand Lundme dr.dk-mut oqarpoq.
Jan Lagermand Lundme dr.dk-mut ilisimatitsivoq inernerusup allanngortinnissaanut peqqutissaqartoqanngitsoq.