DR kalaallinik meeravissiartaartarnerup ajornartorsiutaaneranik sammisaqartoq

Kalaallit Nunaat pillugu annertuumik sammisaqarnermut atatillugu kalaallit meerartaannik Danmarkimi meeravissiartaartoqartarnera pillugu tv-kkut piviusulersaarut DRTV-kkut ullumimiit isiginnaarneqarsinnaalerpoq.

Susanne Sahlgren møder sin biologiske familie i Grønland for første gang i DR-programmet "Grønlands forsvundne børn".

Danmarks Radiomit Kalaallit Nunaat pillugu maannakkorpiaq sammisaqartoqarpoq. Kalaallit Nunaata Danmarkillu ataatsimut oqaluttuassartaat pillugu aallakaatitassiami sisamanik immikkoortortalimmi siulleq sapaatiummat aallakaatinneqarpoq. Aallakaatitassiami Nukâka Coster-Waldau aamma Lars Mikkelsen oqaluttuartuupput.

Ataasinngornermi aallakaatitassiaq alla DRTV-kkut takutinneqassaaq - piviusulersaarut taanna taaguuserneqarsimavoq "Grønlands forsvundne børn" (Kalaallit meerartaat tammarsimasut), aallakaatitassiamilu kalaallit meerartaasa 1970-ikkut tikillugit Danmarkimi meeravissiartaarineqartarsimanerat sammineqarluni:

- Kalaallit meerartaat 1976 tikillugu Danmarkimi meeravissiartaarineqartarsimapput - taakku ilarpassuisa ilaqutaat akuersiteqqaarnagit tamanna pisarsimalluni. Piviusulersaarummi matumani meeravissiartaarineqasimasut ilaat marluk ilaqutavitik naapikkusullugit taamanikkullu meeravissiartaarineqarlutik Kalaallit Nunaanniikkunnaaramik susoqarsimanersoq paaserusullugu Kalaallit Nunaannukarput, DR aallakaatitassiaq pillugu allappoq.

Kalaallit Nunaannukartut marluusut aapparaa Susanne Sahlgren:

- Susannep kalaalli ilaqutavini qanillinaveersaarsimavai, Danmarkimilu ilaqutarsiani peqatigalugit pitsaalluinnartumik inuuneqarsimalluni, piffissalli ingerlanerani arriitsumik qanga kalaallisut inuusimanini soqutigiartulersimallugu, DR allappoq.

DR-ip tv-kkut aallakaatitassiami matuma saniatigut podcasti "Qallunaaq – Kinaavunga" aallakaatitassiarisimavaa. Taanna oqaatsinik ilitsoqqussanik oqalussinnaani qanoq ittuunersoq aamma sumiluunniit angerlarsimasutut misigisinnaanani qanoq ittuunersoq pillugu aallakaatitassiaavoq. TV-kkut aallakaatitassiaq alla, tassalu kunngissap Kalaallit Nunaannut tikeraarneranut tunngasoq aamma takutinneqangajalerpoq.

Powered by Labrador CMS