DR aalajangiusimavoq: Taasinerit tamarmik ilanngunneqarput
Naak taasinermut uppernarsaat kingusissukkut takkukkaluartoq, taasineq kisitsinermut ilaavoq, DR-imi MGP-mut pisortaq neriorsuivoq.
Juliemut aamma Ninamut eqqortumik taasinerit tamarmik kisinneqarput. DR-imi aliikkusersuinermut pisortaq Jan Lagermand Lundme taama naqissusiivoq.
- Systemigut misissoqqeqqammerpakka, taakkulu ajunngitsumik ingerlasimapput. Eqqortumik taasinerit tamarmik ilanngullugit kisinneqarsimapput, taanna Sermitsiaq.AG-mut oqarpoq.
Taasinermut uppernarsaatip kingusissorujussuakkut amerlasuut pissarsiaraat. Tamanna taasinerup atuussimaneranik atuutinnginneranilluunniit nalorninermik pilersitsivoq.
Jan Lagermand Lundmep taasinerit taakku tamarmik ilanngullugit kisinneqarsimasut neriorsuutigaa. Tassami uppernarsaatip nassiunnissaanut piffissaq atorneqartoq sivisusinnaasarneranut nassuiaatissartaqarpoq.
- Melodi Grand Prixeqartillugu amerlasoorpassuit taasisarput. Systemip artorsannginnissaa anguniarlugu SMS-ikkut akissutit ataavartumik nassiussorneq ajorpagut, systemimilu artukkiisinnaanngikkaangata aatsaat nassiuttarlugit. Unnukkullu inuit itertinniarlugit SMS-imik nassiussineq ajorpugut. Taamaattumik ilaasa aqaguani ulloqeqqanut SMS pissarsiarisarpaat.
Taakku uppernarsaatit nalornilersitsillutillu pakatsinermik pilersitsisinnaasut, Jan Lagermand Lundmep paasisinnaavaa.
- Tassami Kalaallit Nunaanni aatsaat siullermeerluni taasisoqarsinnaavoq. Maani Danmarkimi isiginnaartartut systemimik sungiussinikuupput, kisianni aallaqqaammut taamatut qisuariartoqartarnera misiginikuuarput.
- Tamatuma saniatigut Kalaallit Nunaannit taasisorpassuaqartoq oqaatigisinnaavara – aamma finalemi.
Tele-Postimi systemip ajoquteqarsimaneranit maannamut suli paasisaqartoqanngilaq, kisianni suliaq misissoqqissaarneqarpoq.
Tamatuma saniatigut Jan Lagermand Lundmep isiginnaartut taasinerit aamma naliliisartut aalajangiisarnerat tamarmik 50 procentimik naleqarnissaat illersorpaa. Julie aamma Nina isiginnaartut akornanni taasinermi ajugaapput, kisianni naliliisartunit pingajuattut taaneqarlutik.
- Uanga isinnit aaqqissuussaanerup atorsinnaanera takusinnaavara. Tassami soorunami erinarsuut najukkami annertuumik taperserneqarnera inissaminiillunilu nuannerpoq, kisianni tamanna ajugaanermut aalajangiisussaanngilaq. Eurovision Song Contestimi pitsaanerpaamik periarfissalik, nipilersugaq pitaanerpaaq aallartikkusunneruarput.