Dorisip Sermersooq pillugu suliap killiffia paaserusuppaa
Doris J. Jensenip Siumumeersup, Kommuneqarfik Sermersuup ininik attartortitseqqittarnera pillugu suliami susoqarnersoq paaserusuppaa.
Siorna Naalakkersuisuusut Kommuneqarfik Sermersuup nakkutigineqarnissaanut tupaallaataasumik peqqussuteqarput, Namminersorlutik Oqartussanit isumaqartoqarmat, kommuni inatsimmut akerliusumik innuttaasut inissaannik attartortitassanik pissarsiniartartoq.
Kommuneqarfik Sermersuumit oqaatigineqarpoq, namminersortutut aningaasaliissuteqartartut attartortitsisarnissamik isumaqatigiissuteqarfigalugit, illoqarfiit pingaarnersaanni inissaaleqisoqarnera iluarsiiffiginiarsarineqartoq. Nmminersortutut aningaasaliissuteqartartut ininik 300-t missaanniittunik sanaartortitsisimapput, kommunillu taakku innuttaasunut attartorteqqittarlugi.
Aaqqissuussaq ukiumut miliuunilikkaanik kommunimut aningaasartuutaasarpoq, amigartoorutaasarnera pissutigalugu.
Naalakkersuisut taamanikkut piffissami sivisuumi oqaloqatiginnittareerlutiksiorna oktobarip qaammataani aalajangerput, kommuni Kommuninik Nakkutilliisoqarfimmut suliassanngortinneqassasoq.
Kisianni taamanikkulli suliamut atatillugu nutaarsiassaqarpallaarsimanngilaq, maannali Siumumeersup Doris J. Jensenip suliap qanoq ingerlanera pillugu Naalakkersuisut nutaat paasiniaaffigai. Taamaammat paragraf 37 naapertorlugu arlalinnik apeqquteqarsimavoq, tassani Naalakkersuisut nutaat kommunimut atatillugu suliamik unitsitsiniarnersut pillugu akissuteqaqqusivoq aamma Naalakkersuisuni kina suliami akisussaasuunersoq paaserusuppaa.
Borgmesteriusimasoq nakkutilliisoqartarneranut akisussaasuusoq
Sermitsiaq.AG-miittaaq ilaqutariippassuit angerlarsimaffeqarnerannut tunngatillugu suliap ilungersunartup killiffia paasiniarneqarsimavoq.
Namminersorlutik Oqartussat juunip qaammataani Sermitsiaq.AG-mut ilisimatitsissutigaat, Nunamut Namminermut Immikkoortortaqarfik upernaaq qinersisoqareersoq naalakkersuisooqatigiittussat pilersinneqarnerannut atatillugu Naalakkersuisut Siulittaasuata Naalakkersuisoqarfianit Aningaasaqarnermut Naalakkersuisoqarfimmut nuunneqarsimasoq.
Nunamut Namminermut Immikkoortortaqarfik tassaavoq nakkutilliinermut akisussaasuusoq. Taamaalilluni Kommuneqarfik Sermersuumi borgmesteriusimasoq Asii Chemnitz Narup (IA) aningaasaqarnermut nunamullu namminermut naalakkersuisuugami, naalakkersuisutut akisussaasuuvoq.
Asii Chemnitz Narupip borgmesteriunerani inissanik pissarsiniartarnermi kommuni taamatut periuserineqartalersimavoq.
Naalakkersuisoqarfimmit ilanngullugu ilisimatitsissutigineqarpoq, Kommuneqarfik Sermersuup Nuummi innuttaasunik inissaqartitsiniartarnera suli nakkutigineqartoq.
Nakkutilliisut utaqqimaarneqartut
- Nakkutilliisut suliap pillugu 2020-mi novembarip qaammataani ataatsimiissimapput. Ataatsimiinnermi aalajangiunneqarsimavoq, Nakkutilliisut suliaq pillugu naliliillutillu aalajangiitinnagit, suliaq qulaajaaffigineqaqqissasoq, naalakkersuisoqarfik Sermitisaq.AG-mut allakkatigut akissuteqarluni ilisimatitsivoq.
Nakkutilliisut oqaaseqartinniarneqarnerat imaluunniit Naalakkersuisup Asii Chemnitz Narupip itisiliitillugu akissuteqartinniarneqarnera suli iluatsinneqanngillat.