KNR-radio
Dorisip KNR-imik pinngitsaaliilluni Inatsisartut ataatsimiinnerinut aallakaatitsisarnissamut itigartitsivoq
KNR pisortat suliffeqarfiutigivaat namminersortoq, tusagassiorfiullu innuttaasunut kiffartuussisup samminiakkani nammineq aalajangertarpai, kultureqarnermut naalakkersuisoq Doris Jakobsen, KNR-imut pinngitsaaliilluni Inatsisartut ataatsimiinnerinik toqqaannartumik aallakaatitsisarnissamik itigartitsivoq.
Inatsisartut aamma Naalakkersuisut radiukkut toqqaannartumik Inatsisartut ataatsimiinnerannik KNR pinngitsaalillugu aallakaatitsisalertissinnaanngilaat.
Kultureqarnermut naalakkersuisoq Doris Jakobsen (S), KNR-ip Inatsisartut ataatsimiinnerannik toqqaannartumik radiukkut aallakaatitsisalernissaannik siunnersuummut suliaqarnerannut atatillugu akissuteqaatimini taama allappoq.
Pinngitsaalineqarsinnaangitsoq
Inatsisartut ataatsimiinnerannut innuttaasut malinnaanissaminnut periarfissaqartinneqartariaqarnerannik Inatsisartut Siulittaasoqarfiata siunnersuutaa Naalakkersuisut isumaqatigaat.
KNR kisianni pinngitsaalillugu ataatsimiinnernik aallakaatitsititaasinnaanngilaq, tusagassiorfik innuttaasunik kiffartuussisoq namminersortuugami, kiffartuussinermullu isumaqatigiissummi ataatsimiinnernik KNR-radio aallakaatitsinissaanut pisussaaffeqarneranik allaqqasoqanngilaq.
Taamaattoq inatsisip allanngortinneqarnissaanut periarfissaqarpoq, KNR-ilu 2018-ip aallartinnerani taamaattunik aallakaatitsinissamut pisussaaffilerneqarsinnaalluni, Doris Jakonsen ilisimatitsivoq.
Sumiiffinni radioqarfiit atorneqarsinnaaneri
Kisianni suliami tassani aaqqiissummik nassaartoqarnissaa Naalakkersuisut kissaatigaat.
- Inatsisartut ataatsimiittarfianni ataatsimiinnernik kissaateqarnerup piviusunngortinnissaanut sumiiffinni radioqarfiit peqataatinneqarsinnaanerat aamma isumaliutigineqartariaqartoq, Doris Jakobsen oqarpoq.
Naalakkersuisut taamaalillutik KNR-ip Inatsisartut ataatsimiinnerannik radiokkut aallakaatitsisarnissaannut siunnersuummut akerliupput.