Doris: Nunatsinni piumassutsiminnik upalungaarsimasunik pilersitsisoqarli

Tallimanngormat Folketingimi Issittoq sammineqaerpoq, qallunaat nunanut allanut ministeriata Martin Lidegaard, Radikale Venstre-neersup, naalakkersuisut Issittumut nassuiaataat saqqummiummagu.

Siumut tunuliaqutaralugu folketingimut ilaasortap Doris Jakobsenip, nunatsinni qineqqusaarneq pissutigalugu tallimanngormat folketingip ataatsimiittarfiani issittumut nassuiaammut peqataasinnaanngitsup, taarsiullugu issittumut nassuiaammut atatillugu nunanut allanut ministeri isumaliutersuutiminik apeqqutinillu ammasumik allagaqarfigaa.

Doris Jakobsenillu nunanut allanut ministerimut allakkani ima aallartippai:

– Nassuiaammi immikkoortut ataasiakkaat iserfigissanngilakka, maluginiarparali nassuiaat sammisatigut arlalitsigut ingerlatanut nalunaarusianullu arlalinnut, suli naammassineqarsimanngitsunut, innersuussuteqartoq, Doris Jakobsen allappoq nangillunilu:

– Tamatumani ilaatigut Kalaallit Nunaanni siunissami illersornissamut iluuseqarnissaq, tamatumani tamassuma pisariaqartinneqarneranik misissuineq suli Forsvarsministereqarfimmit utaqqigatsigu, taanna allappoq.

Tamannarpiarlu pissutigalugu Doris Jakobsenip kissaatigaa Kalaallit Nunaanni piumassutsiminnik upalungaarsimasunik pilersitsisoqartariaqartoq:

– Tamatumunnga atatillugu siusinnerusukkut siunnersuutiga innersuussutigissavara, tassa siunnersuutiginikuugakku islandimiut periusiat malillugu Kalaallit Nunaanni piumassutsiminnik upalungaarsimasunik piareernerpaamik pilersitsisoqartariaqartoq, Doris Jakobsen nunanut allanut ministerimut Martin Lidegaardimut allappoq nangillunilu:

– Kalaallit Nunaata imartaani nunamilu ingerlatsinerit annertusigaluttuinnarput, sermillu aakkiartornera pissutigalugu ingerlassanik ammaassisoqassammat pingaaruteqarput pissutsinut atuligassanut piareersarnissarput, Doris Jakobsen allappoq.

Kalaallit Nunaanni piumassutsiminnik upalungaarsimasunik apeqqutip saniatigut Doris Jakobsenip aamma tikippai inuussutissarsiornermut politikki, sakkutooqarfiit qimanneqarsimasut, silasiorfiit atortullu allat, USA-p Kalaallit Nunaanni pigisimasai.