Doris: Kalaallit Nunaanni ilaqutariinnut politikki sammineqarnerulerli

Arnat qinersisinnaatitaanerat Københavnimi sisamanngornermi tallimanngornermilu pisortatigoortumik nalliuttorsiortigineqarpoq. Folketingip arnat qinersisinnaatitaalerneranniit ukiut 100-nngornerat nalliuttorsiutigineqarpoq, tamatumanilu kunngikkormiut, dronning Margrethe kunngissakkullu, Danmarkip naalakkersuisui ministeriunerlu Helle Thorning-Schmidt, ministerit arlallit, Folketingimut ilaasortat kiisalu eqqartuussiviit qullersaanni eqqartuussisut pisortatigoortumik nalliuttorsiualaarnernut Tivolimi Congres Centerimi aamma Christiansborgimi Landstingsalimi Rigsdagsgårdimilu ingerlanneqartunut peqataallutik.

Siumut sinnerlugu Folketingimut ilaasortaq Doris Jakobsen aappani Ejvind Jensen peqatigalugu nalliuttorsiornernut peqataasoq Kalaallit Nunaanni arnanut sulinermi atugassarititaasut pitsanngorsarneqarnissaannik sulissutiginnikkusuppoq. Politikeri ukiut sisamat matuma siorna Folketingimut qinigassanngortinniarluni aalajangerami isornartorsiorneqarsimavoq:

- Qinigassanngortinnera arnamit qinersisartumit isornartorsiorneqarpoq: Folketingimut ilaasortanngornak meeqqatit paariniakkit, oqarfigaanga. Isumaqarpunga arnat Kalaallit Nunaanni atuuffiannik isiginnittaaseq nutarterneqartariaqartoq. Uagut arnat angutitulli sulisinnaasariaqarpugut sulinitsinnik illersuisariaqarata. Angutit ataatanngoraamik sulinertik illersortussaasanngilaat, Doris Jakobsen oqarpoq.

Doris Jakobsen isumaqarpoq, Kalaallit Nunaanni arnanut suliffeqarnermullu isiginnittaatsip nutaap eqqunnissaanut piffissanngortoq.

- Arnat ilinniarluarsimasut angutinit amerlanerupput, taamaakkaluartorli aqutsisutut atorfiit amerlanerpaartaat angutinik inuttaqarlutik, ilaatigut arnat erninermut atatillugu sulinngiffeqarsinnaasarmata, Doris Jakobsen nalliuttorsiornerit kingorna uparuaalluni oqarpoq.

Norgemi periuseq

- Norgemi periuseq inuiaqatigiit arnanut sulisussanut eqaannerujussuarmik isiginnittaaseqarfigisaat qimerloortariaqarparput, Doris Jakobsen oqarpoq.

Anaanaq kisermaaq meeqqani napparsimalerpat angerlarsimaffimminit sulisinnaavoq. Kisianni suliffeqarfiup akiligassaanik aamma paarsisussarsiorsinnaavoq, namminerlu suliartorluni. Taamaattumik Norgemi arnatut aqutsisunngornissaq politikerinngornissarluunniit pilerinarnerujussuanngorsimapput, Doris Jakobsen oqaluttuarpoq.

- Norgemi arnat aqutsisut amerlanerulersimapput. Arnanut politikeriunissaq pilerinarnerulersimavoq, meerarisap sulinermut atatillugu angalanermut ilaginissaa aamma toqqarneqarsinnaalersimammat.

Kalaallit Nunaanni nutaamik eqqarsartariaqarpugut Norgemilu periuseq qissimigaarluguluunniit, Doris Jakobsen siunnersuuteqarpoq.

Inatsisartut siulittaasuat Lars-Emil Johansen, Siumut, nalliuttorsiornernut aamma peqataavoq.

Arnat Kalaallit Nunaanni 1948-mi qinersisinnaatitaalerput.