Skip to main content

Doris Jakobsenip pisimasoq alianartoq annilaarutigaa

Aalborgimi ilisinermut alianartumut pisumut Folketingimi ilaasortamit Siumumeersumit Doris Jakobsenimit qisuariarfigineqarpoq. Taamatut pisoqaqqinnginnissaa politikkerip danskit naalakkersuisuinut oqariartuutigaa

Aalborgimi ilisisoqarneranut alianartumut pisumut folketingimi ilaasortaq Siumumeersoq Doris Jakobsen qisuariaateqarpoq. Taamatut pisoqaqqinnginnissaa anguniarlugu danskit naalakkersuisuinut apeqquteqarpoq. 

Wilhelm Amossenip Aalborgimi toqqukkut qimagutereernerani Nanortalimmi ilaqutaasut ullut 14-t qaangiunneranni aatsaat ilisimatinneqartut Sermitsiaq.AG-mi marlunngormat allaaserineqarpoq. Wilhelm Amossenip ikinngutaasa ilaat nammineerluni politeeqarfimmut paasiniaajartorpoq marsip pingajuani, tassani ilisimatinneqarpoq Wilhelm Amossen februaarip 17-ani toqukkut qimagussimasoq. 

Taamatut pisoqaqqissanngilaq
- Inuppassuit ilaquttaminnik qimaguttunut ileqqorissaarlutik pingaartorsiorlutillu inuulluaqqusinissartik pisariaqartittarpaat, - inuunerminni ingerlaqqinnginnerminni. Tamakkualu pissutigalugit kalaallit Danmarkimi palaseqartinneqalerput. Ilaqutaasummi qimaguttortatik piviusumik inuulluaqqusinnaaniassammatigit. Uanilu pisumi toqusup ilisaanissaanut aqaguttoq aatsaat ilaqutai ilisimatinneqarput. Taama ingerlatsisoqartussaanngilaq, Doris Jakobsen oqarpoq. 

Danskit naalakkersuisuinut pingasunik apeqquteqaateqarpoq. 

- Pisimasup alianartup uteqqinneqarsinnaanera pingitsoortittariaqarparput. Kukkussuteqarnikkut pisimasut aalajangertariaqanngilaat ilaqutaasut asasaminnut inuulluaqqusisinnaanerat periarfissinneqartassanersut. Naatsorsuutigilluinnarpara Danskit Naalakkersuisuisa apeqqut pillugu iliuuseqarumaartut. Tamannalu pissutigerpiarlugu Danskit Naalakkersuisuinut pingasunik apeqquteqarpunga, Siumut tunuliaqutaralugu Folketingimi ilaasortaq nassuiaavoq. 

Kalaaleq palaserineqanngitsoq
Oline Berthelsen Aarhusimi Vor Frue Sognimi palasitut atorfinitsinneqarpoq aggustimi 2014-mi. Kalaallinut Danmarkimi najugaqartunut sullissisussaatitaavoq. Wilhelm Amossenip ilisaanerani kalaaleqatini peqatigalugit naalagiaqataavoq.

Ilisinermi palasiusinnaanerluni imaluunniit arlaannik suliaqarsinnaanerluni aperineqarsimannginnini Oline Berthelsenip Sermitsiaq.AG-mut oqaatigaa. Iligiinnit imaluunniit ilaqutaasunit tamakku isumagineqartartut Oline Berthelsenip nassuiaatigaa. 

Wilhelm Amossen 64-nik ukioqarluni toqukkut qimaguppoq. 

Danskit naalakkersuisuinut Doris Jakobsen ima apeqquteqarpoq:

  • Ministerip qanoq isiornermigut Danmarkimi kalaallinik toqusoqartillugu Kalaallit Nunaanni ilaqutaasut ilisimatinneqartarnissaat qulakkeerniarpaa?
  • Sooq Wilhelm Amossen palasimit qallunaamit ilineqarpa, massa Kalaallit palasiat Oline Berthelsen ilisinermi peqataagaluartoq?
  • Danmarkimi toqusoqartillugu nalinnginnaava politiit ilaqutaasunik ilisimatitsisussaatitaanerminnik toqusup ikinngutaannut tunniussisarnerat, tassa akisussaaffiliisarnerat?

Apeqqut siulleq pingajualu inatsisinut atuutsitsinermut ministeriaqarfimmut nassiunneqarput apeqqutillu aappaa ilageeqarnermut ministeriaqarfimmut nassiunneqarluni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER