Doris Jakobsenip nunani avannarlerni ministeri naapippaa

Peqqissutsimut aammalu Nunanik Avannarlernik Suleqateqarnermut Naalakkersuisup Doris Jakobsen-ip ullumi nunani avannarlerni suleqatigiinnermi suleqatitaani danskit suleqatigiinnermut ministeriat Carl Holst ataatsimeeqatigaa.

Danmark ukioq manna Nunani Avannarlerni Ministerit Siunersuisooqatigiivini siulittaasuutitaqarpoq, Naalakkersuisullu ukioq naallugu susassaqarfimmi tamatumani danskinik suleqateqamminnik angusaqarluartumik suleqateqarsimapput.

Tamanna tunngavigalugu martsip qaammataani Ilulissani Suleqatigiinnermut Ministerit ataatsimiipput aammalu Inatsiseqarnermut Ministerit aamma tassani septembarip naalernerani ataatsimiissallutik.

Suliat pissanganartut
- Danskit siulittaasuutitaqarnerat, nunat avannarliit suleqatigiinnerisa iluanni, suliniutinik kalaallinut soqutiginaateqartunik periarfissiisimavoq. Pinngortitaleriffiup immami Kalaallit Nunaata Kangiani uumassusillit assigiinngisitaarneri pillugit paasiniaanermut suliniut pisortaaffigaa. Matumunnga ilanngunneqassaaq, suliniummik ingerlataqarnissamut periarfissinneqarsimagatta, taamaalilluta pinngortitaq aammalu uumasut ulluinnarni inuuniutivut pillugit aalisartut piniartullu ilisimasaannik katersinissamut periutsinik ineriartortitsinissamut tunngavissiisussanik, Doris Jakobsen oqarpoq.

Suleqatigiinnissaq
- Uannut pingaaruteqarpoq – maanna Københavmini tikeraarninni – Danmarkimi suleqatinnik ilassinninnissara, tassami ungasinngitsukkut septembarip 23-anni suleqatigiinnermut ministerit siunnersuisooqatigiivini ataatsimiittussaagatta. Maannangaaq paasinarsereerpoq, Carl Holst-ip siulianik pitsaasumik suleqateqarsimanerput piffissami aggersumi nangikkumaaripput, Doris Jakobsen naggasiivoq.