kritik

Doris Jakobsen: Tom Ostermannip atorfinitsitaanera atorunnaarsillugu

– Partiitsinni pissutsit isornartoqarput, taamaattumik Naalakkersuisut katitigaanerat nalileqqittariaqarparput, Siumut tunuliaqutaralugu Inatsisartunut Folketingimullu ilaasortaq Doris Jakobsen oqarpoq

Doris Jakobsenip piumasaraa Tom Ostermannip atorfinitsinneqarnera atorunnaarsinneqassasoq. Ilanngullugu piumasaraa Naalakkersuisut taarserneqassasut.

– Maannakkorpiaq siumukkormiuulluni tulluusimaarnaruminaappoq.
Taamatut Inatsisartunut Folketingimullu ilaasortaq Doris Jakobsen, Siumut, arfininngormat Facebook-imi allappoq. Naalakkersuisut siulittaasuata Aleqa Hammondip inooqataanik Tom Ostermannimik politikkimi siunnersortitut Naalakkersuisut atorfinitsitsinerat taassuma isumatsaatigaa.
Aamma atuaruk: Aleqap aappaa Naalakkersuisunut qanittumi
Aamma atuaruk: Kristian Jeremiassen: Qanigisamik pingaartitsineruvoq
Aamma atuaruk: Aleqap qanigisamik pingaartitsineraaneq eqqunnginnerarpaa
– Partiitsinni pissutsit isornartoqarput. Naalakkersuisut kingullermik iliuusaat eqqarsaatigilluagaanngillat. Taamaattumik ippassaq (tallimanngormat, aaqqiss.) Siumup gruppiani ataatsimiinnermi oqaatigaara Naalakkersuisut katitigaanerat nalileqqinneqartariaqartoq, Doris Jakobsen allappoq.
Atorfinitsitsineq atorunnaarsillugu
Naalakkersuisunik taarsiinerup saniatigut Doris Jakobsen aamma isumaqarpoq Tom Ostermannip atorfinitsitaanera atorunnaarsinneqartariaqartoq.
– Siumup gruppianut oqarpunga atorfinitsitsineq atorunnaarsinneqartariaqartoq. Peqqusiileqinaqaaq, qinersisartorpassuillu pakatsisimaqaat, Doris Jakobsen facebookimi quppernermini allappoq, taannalu 180-it angullugit ammarsimavaat.
Tom Ostermannip atorfinitsitaaneranik nalunaaruteqarnerup kingorna naalakkersuisunut siulittaasuusimasoq Siumumilu sulirttaasuusimasoq Hans Enoksen partiimit anivoq, tamannalu peqatigalugu Siumut tunuliaqutaralugu Inatsisartunut ilaasortap Kristian Jeremiassenip atorfinitsitsineq isornartorsiorpaa:
– Tamanna qanigisamik pingaartitsineruvoq, Kristian Jeremiassen Sermitsiaq.AG-mut oqarpoq.

Powered by Labrador CMS