Skip to main content

Doris J. Jensen: Tusagassiorfiit malersorpaatigut

Doris J. Jensen isumaqarpoq, Kalaallit Nunaanni tusagassiorfiit partiinut allanut sanilliullugu Siumut sakkortunerusumik oqaaseqarfigisaraat, apeqquserpaalu tusagassiorfiit politikkikkut isummersimanersut imaluunniit arlaatigut siunertaqapilunnersut.

Siumup Inatsisartuni gruppianni siulittaasup Doris J. Jensenip tusagassiorfinnut nalunaaruteqarnermini Kalaallit Nunaanni tusagassiorfiit sakkortuumik isornartorsiorpai, piffissami kingullermi suliat assigiinngitsut Siumumi politikkerinut tunngassuteqartut sammineqarneri pissutigalugu.

- Oqartariaqarpunga, Kalaallit Nunaanni tusagassiorfiit Siumumi ilaasortat ataasiakkaat akulikilliartuinnartumik sammisalersimagaat, Doris J. Jensen allappoq.

- Apererusunnarpoq, Kalaallit Nunaanni tugassiorfiit ilisimaaralugut – imaluunniit ilisimaarinagu politikkikkut isummersimanersut? Imaluunniit taamatut saqqummiussisarnerminni arlaatigut siunertaqarnersut, taanna allappoq.

Nipisaat, biili aalisariutinullu tapiissutit

Sammineqartut politikkerip akerliineranut pissutaasut tassaapput, Kim Kielsenip Nipisattassiissutinut tunngatillugu suliaqarsimanera, Siumumi politikkerit aalisariutisinissaminnut pisortanit tapiissutisisimanerat kiisalu Kielsenip sulinerminut atatillugu biiliminik atuisimanera kingullertigut oqaluttuarineqartartoq.

Doris J. Jensen naapertorlugu oqaluttuarineqartut kukkuneqarput, tupigusuutiginerarpaalu politikkerit partiinit allaneersut sooq sammineqannginneri.

- Politikkerertavut amerlasuutigut tusagassiuutitigut innarlerneqartutut misigisimasarput, tamatuma kinguneranik innuttaasut politikkikkut suliaqalerusuttut ikiliartorput.

Isumaqarpit tusagassiorfitsigut innarliinerusoq, tusagassiortut politikkerit salliutitsineri ileqqorissaartuunissaallu pillugit apeqquteqartarnerat?

Soorunami tusagassiortut tamanna suliassaraat, illuinnarsiornerilli eqqunngitsumillu paasissutissiisarnerit pineqartillugit allarluinnaavoq, Doris J. Jensen Sermitsiaq.AG-mut akissuteqarluni oqarpoq.

Pissusissamisuuginnanngila, partiitut anginerpaatut pissaaneqarnerpaagassi aperineqakulaarnerusarnersi?

- Tusagassiortut arlalippassuarnik misissuisarnerat ajunngilluinnarpoq, partiilli ataasiinnaap misissorneqartarnera akuersaarneqarsinnaanngilaq, isumaqarpungalu tamanna naapertuinngitsuliornerusoq.

Ilisimatusarfiup 2018-imi misissuisimanerani Kalaallit Nunaanni tusagassiorfiit qulaajaaffigineqarsimapput. Ilaatigut misissorneqarsimavoq, partiit assigiinngitsut tusagassiorfinnit qanoq sammineqartigisarnerat. Tassanilu paasineqarsimavoq, partiit naalakkersuisooqatigiissitallit illuatungiliuttunit tusagassiorfinnit oqaaseqartinneqarnerusartut, tassani apeqqutaanani partiit sorliunersut.

- Tusagassiorfiit amerlasuutigut pineqartunik erseqqissaaneq ajorput, inuilli sulilluartut nunaminnut tunngatillugu pitsaanerpaamik angusaqarniartut akornanni tatigeqatigiikkunnaarnissaq anguniartarpaat, Doris J. Jensen tusagassiorfinnut nalunaaruteqarnermi allappoq.

Kim Kielsen nipisattassiissutit pillugit Sermitsiaq.AG-mit apersorneqarnissamut ataasiarluniluunniit akuersaarnikuunngilaq, naak arlaleriarluni saaffigineqartaraluarluni, paasisinnaaviuk politikkerit oqaaseqarusunngikkaangata, tusagassiorfiit sammineqartoq pillugu illuatungaanit aamma erseqqissaanissamik ajornartitsisarmata?

-Tunngavissaqarluarluni naameertoqartarpoq, tassa tusagassiortut ilaannut tatiginnikkunnaarsimagaanni, Doris J. Jensen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER