Doris: IA oqallinermi tunngavilersuisinnaajunnarpoq
- Uranimik piiaasoqarsinnaavoq isumannanngitsumik, Doris Jakobsen, Siumut, oqarpoq
Nittartakkakkut sisamanngornerup ullaavani saqqummiunneqarpoq Inuit Ataqatigiit Inatsisartuni ilaasortaatitaata Aqqaluaq B. Egedep Siumumeersumut Doris Jakobsenimut oqaaseqaataa, tassani uranimik akulinnik piiaasoqarsinnaanissaanut kukkuneri qimarratigineqassanngitsut oqaatigimmagit.
Taannalu oqaaseqaat Doris Jakobsenip akissuteqarfigaa:
’Nalunaarusiat kingulliit inerniliinerisa kingorna IA pitsaanerusunik tunngavissaarussimagunarpoq. Qineqqusaarneq sioqqullugu, nalaani kingornalu aatsitassanik radiop qinngornerinik ulorianartunik akulinni, tamatumani ilanngullugu uranimik, piiaanissaq oqallisigaarput. Oqallinnermi matumani, inunni misigissutsinik qaffakaatitsisumi, piviusut isiginiarnissaat immikkut pingaaruteqarpoq.
Australia Canadalu qiviarsigik
Piviusut tassaapput Australiami Canadamilu aatsitassanik uranimik akulinnik piiaasoqarsinnaammat, piiaaffiup eqqaani innuttaasunut avatangiisinullu akornutaannghitsumik. Piviusut tassaapput Kuannersuarni aatsitassat uranimik akoqassusiat suliniutinut assigisaanut sanilliullugit annikitsuararsuummat. Piviusut tassaapput ullut tamaasa tamatta qinngortittaratta, taamaattumillu qinngornerit annertussusaat uuttorneqarsinnaavoq, nalilissagaanni quliniummiilluni qanittuaniluunniit ulorianartoqarnersoq - tassaagaluarpat Kuannersuarni piiaaffik imaluunniit Narsap Atuarfia.
Aqqaluaq B. Egede aviisisi Sermitsiami septembarip 13-ani saqqummersumi oqarpoq Narsap Atuarfia radion-imik ajornartorsiuteqassanngikkaluarpoq sanaartoriaatsit eqqortut atorneqarsimasuuppata. Taamatuttaaq pingaaruteqarpoq uranimut piiaanissamut malittarisassanik iluameersunik akuersissuteqarnissarput, tamanna qularnaatsumik ingerlanneqaqqullugu.
Piviusorsiortumik oqallinneq ujartorpaa
Oqanngilanga Kuannersuit suliniutilluunniit allat radiop qinngornerinik ulorianartunik akullit uloriananngitsut. Australiamilli Canadamillu misilittakkat takutippaat eqqortunik malittarisassioraanni piiaaneq namminermini ulorianartuunngitsoq. Taamaattumik uranimik stoffinillu allanik radiop qinngorneranik ulorianartunik akulinnik piiaanissamut akuersitinnata soorunami eqqortunik malittarisassiussaagut, piiaaneq immikkullu ilisimaasallit nakkutilliinerat toqqissisimanartuussappata. Tamanna Siumumi oqaatigiuartarsimavarput.
Sallusutit pasillerneqarnera pinnagu tamassuma Inatsisartuni IA-mik piviusorsiortumik oqallisiginissaa qilanaaraara,’ Doris Jakobsen tikkuaavoq.