Skip to main content

Doris: Danskisut ilinniariartorlutik efterskoleriartarput

Ilinniartitaanermut Naalakkersuisup Doris J. Jensenip aamma Efterskoleforeningip siulittaasuata Troels Borringip ataatsimoorlutik kalaallit Danmarkimi efterskolertut oqaaseqarfigaa

Kalaallit Illuanni Københavnimiittumi ilinniarnermut siunnersortit kalaallinut arfineq-marlunnut efterskolertunut ajornartorsiortunut ikiuisariaqallassimasut sapaatip akunnera ingerlariitsiartoq saqqummerpoq. Massakkullu Ilinniartitaanermut Naalakkersuisoq aamma Efterskoleforeningimut siulittaasoq ataatsimoorlutik oqaaseqarput:

Aamma atuaruk: Danmarkimi efterskolertorpassuit taamaatitsisariaqartut

Imminut assortortoq

Ilinniartitaanermut Naalakkersuisup Doris J. Jensenip aamma Efterskoleforeningip siulittaasuata Troels Borringip ataatsimoorlutik oqaaseqaamminni kalaallit efterskolertartut taamaatiinnartartut amerlavallaarujussuartut oqaatigaat, oqaatsitigulli ajornartorsiut pissutaanerarneqarnera imminut assortutut taallugu.

- Kalaallit inuusuttut amerlaqisut ukioq ataaseq Danmarkimi efterskolernertik pissarsiaqaatigilluartarpaat, inuttut, ilikkagassatigut minnerunngitsumillu oqaatsitigut inerikkiartuutigilluartarlugu. Tassami kalaallit efterskolertut amerlaqisut Danmarkimi efterskolertarput qallunaatut piginnaasatik annertusarumallugit, ilinniaqqinnissartik siunertaralugu – annermik pissutigalugu qallunaat oqaasiinik piginnaasaqarluarnissaq kingusinnerusukkut ilinniaqqinnerup iluatsinnissaanut pingaaruteqartorujussuummat. Taamaammat aamma imminut assortuuttutut ippoq, oqaatsitigut piginnaasakinnerit ikerinnakkut unittarnermut peqqutaaqataasutut oqaatigineqarmata, naak taakkorpiaat piginnaasaqarfiginerulernissaat tassaagaluartut inuusuttut efterskoleriarnerinut pissutaanerpaasartut, Doris J. Jensen aamma Troels Borring oqarput.

Peqqutit arlaqartut

Ilinniartitaanermut Naalakkersuisup Efterskoleforeningillu siulittaasuata ukioq manna martsip qaammataata aallartinnerani Efterskoleforeningip ukiumoortumik ataatsimiinnerani ikerinnakkut unittarneq aammattaaq oqallisigisatsinni annertuumik inituvoq.

- Ikerinnakkut unittarnerit arlalinnik assigiinngitsorpassuarnillu peqquteqarsinnaapput, kisianni pingaarluinnartuuvoq inuusuttut inooqatigiinnikkut, kulturikkut minnerunngitsumillu oqaatsitigut ilikkagassatigullu unamminartunut, avatangiiserisaminnit sungiusimasaminnit ungasissorsuarmiillutik efterskolernerminni naapitassaminnut piareersarluarsimanissaat.

Taakku isumaqatigiissutigaa suliniuteqartoqartariaqartoq, isumaqatigiippullu 2018-imi aasarnissaata tungaanut suliniutit marluk uku piviusunngortinnissaat sulissutiginiarlutigit:

Danmarkimi efterskolini ilinnialersussanut kalaallinut sapaatip-akunneranik ataatsimik sivisussusilimmik piareersartarneq pilersinneqassaaq. Suliaq tamanna pissaaq Ilinniartitaanermut Aqutsisoqarfiup, Efterskoleforeningip, Kalaallit Illuisa, Peqatigiiffiup Kalaallit Meerartaasa suleqatillu naapertuuttut allat suleqatigiinnerisigut. Piareersarnermut ilaatigut imaritinneqassapput efterskolit aaqqissugaanerannik ilisarititsineq, danskit oqaasiinik ilitsoqqussarinagit oqaatsitut ilinniartitsineq aamma sammisassat attaveqaateqalerfiusut.

Efterskoleforeningip aamma Ilinniartitaanermut Aqutsisoqarfiup suleqatigiinnerisigut kalaallinut Danmarkimi efterskolertunut Kalaallit Nunaanni inaarutaasumik misilitsinnerit neqeroorutiginissaannut periarfissat misiligarneqassapput. Aallaqqaammut efterskolini marlunni-pingasuni misiliutitut. Inuusuttut namminneq toqqarsinnaavaat Kalaallit Nunaanni Danmarkimiluunniit inaarutaasumik misilitsinneq peqataaffiginiarnerlugu, ilinniaqqinnissaminnut pisortatigoortumik piumasaqaatit suut piviusunngortittariaqarnerat apeqqutaatillugu.

Tamakku saniatigut isumaqatigiissutigaat, suliniuteqarfissatut isumassarsiat arlallit sulissutiginerat ingerlateqqinniarlugit, taannalu Namminersorlutik Oqartussat nittartagaanni atuarneqarsinnaavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER