Skip to main content

Donald Trumpip oqaaseqareernerata kingorna: Visit Greenlandip nittartagaa alakkarneqarluartoq

Kalaallit Nunaat Danmarkimiit pisiarineqarsinnaaneranut periarfissaqarnersoq pillugu Donald Trump siunnersortiminik oqaloqateqartarsimanera sapaatip akunnerata siuliani nutaarsiassaareersorlu Visit Greenlandip nittartagaa nunanit allanit alakkarneqarluarpoq.

Visit Greenlandip nittartagaa ulluni makkunani alakkarneqarluarpoq. Donald Trumpip nunamik pisiumalluni nalunaaruteqareernerata kingorna, nunarsuarmi qeqertat annersaat suunersoq tamanit paasineqarusulersimavoq.

- Kalaallit Nunaat nutaarsiassaneereermat kikkut tamarmik paaserusulersimavaat Kalaallit Nunaat suunersoq, nunarpullu pillugu paasinnikkusuttut nittartakkatsinnut alakkaasartut amerlanerungaatsiarput, Visit Greenlandip pisortaa Julia Pars Sermitsiaq.AG-mut oqarpoq.

Pisortap ilisimatitsissutigisinnaanngilaa nittartakkamut ullormut alakkaasartut qasserpiaanersut, nalinginnaasumiilli alakkaasartut amerlanerusut oqaatigalugu. Nutaarsiassaq nunarsuarmi tamarmi siaruareersorlu Visit Greenlandip nittartagaa tallimanngormat arlalinnit alakkarneqarpoq, tamassumalu kingunerisaanit attaveerussimagaluartoq, Julia Pars ilisimatitsivoq.

Taassuma neriuutigaa Kalaallit Nunaannik soqutiginninneq nunatsinnut takornariartunut amerlanerulersitsissasoq.

- Neriuutigisinnaavarput amerikamiut amerlanerusut Kalaallit Nunaannut tikeraarusuttalissasut, oqarpoq. Taassuma erseqqissarpaa Islandimi qaqqarsuaq innermik anitsisartoq anitsingaatsiarnerata kingorna timmisartut angalasinnaajunnaarmata Island soqutigineqarnerulersimasoq, kingornalu takornariartut amerlanerulersimallutik.

Trump USA-lu pillugit immikkoortortaq nutaaq

Visit Greenlandip suliaasa pingaarnersaat tassaavoq Kalaallit Nunaat nunat tamalaat akornanni saqqumilaarnerutilissallugu. Donald Trumpillu soqutiginninnera nittarsaassinermut iluaqutaangaatsiarpoq. Nittarsaassinerlu taama annertutigitillugu Visit Greenlandimi sulisut eqqissisimaaginnarsinnaanngillat.

- Nittartakkatsinni immikkoortumik nutaamik sanavugut, immikkoortumi tassani USA-p Kalaallit Nunaannut soqutiginninnera atuarneqarsinnaavoq.

Pisortaq nassuiaavoq USA-p Kalaallit Nunaatalu qanoq oqaluttuassartaqarnera pillugu soqutiginnittut nittartakkami Visit Greenlandimi atuarnerusinnaasut, paasisaqarusuttullu nittartakkami ujaasisarfikkut ateq Trump allaannassagaat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER