Skip to main content

DMI: Imaata sikua sukkasuupilussuarmik aakkiartorpoq

Imaata sikua nalinginnaasumik pisarnerminit aakkiartupallanneruvoq. Qalasersuup Avannarliup sikua ukiup taamaalinerani taamak annikitsigitillugu uuttortarneqanngisaannarsimavoq.

Qalasersuup Avannarliup sikua juulip qaammataata qiteqqunerani aakkiartulermat, aasap ingerlanerani aatsaat taamak aakkiartortiginissaanut takussutissaqarsimanngilaq. Sibirimiali kiannersuata siku ima aatsitsigisimavaa, allaat Nordøstpassage ammarsimalluni aamma ukiup taamaalinerani Issittoq tamarmi aatsaat taamak sikukitsigilerluni.

DMI tusagassiorfinnut nalunaaruteqarnermi taamatut ilisimatitsivoq.

Danmarkip pingasoriaataanik ullormut aattoqartartoq

Qalasersuup Avannarliup sikua ukiup taamaalinerani Danmarkip marloriaataanik ullormut aattaraluarpoq. Tamanna annertoorujussuartut isigineqarsinnaagaluarpoq, qaammatilli kingulliup ingerlanerani ullormut aattoqartarnera Danmarkip angissusaata pingasoriaatingajaanik annertussuseqarsimavoq. Sikulli Danmarkisut angitigisup ullormut aattarnera sunniuteqartussaavoq.

Pingaartumik Sibiriap avannaata tungaani imartaq sikuerussimavoq, maannalu nalinginnaasumut sanilliullugu sikukinnerujussuulluni.

Sikukinnerulernera ajortumik ingerlasoqarneranut attuumassuteqarpoq, imaata sikuanik ilisimatooq Rasmuts Tage Tonboe nassuiaavoq:

- Sikuerukkiartornerani imaq kiannerulersarpoq. Maannakkorpiaq sikup sinaani immap qaava nalinginnaasumit kianneruvoq. Immap kiannerata malitsigisaanik siku suli aakkiartornerusarpoq, taamalu ukiakkut kingusinnerusukkut sikoqqittarluni, tassa imaq kissartoq qerinnginnermini nillerteqqaartussaagami, imaata sikuanik ilisimatooq ilisimatitsivoq, nangilluni oqarluni:

- Siku kingusinnerusukkut qeringaangat, ukiukkut issunerulerneq ajorpoq, nalinginnaasumimmi ukiukkut issunerulertuaannarmat. Upernaamut siku kaanngajaarnerussaaq, tassa siku qajannarnerulersimassagami, taamalu tamatuma malitsigisaanik sukkanerusumik aakkiartulissalluni.

Imaq sumiiffinni ukunani kiappoq

Karahavet aamma Sibiriap avannaata tungaaniittoq Laptevhavet kiisalu Kalaallit Nunaata Canadallu akornanniittoq Baffinip Kangerliumanersuata imartaa nalinginnaanngilluinnartumik ima kiatsigipput, imaq qaqutigoortumik kissassimalluni - nalinginnaasumut sanilliullugu 4 gradit sinnerlugit kialluni.

Imaata sikuata aakkiartornera sukkatsikkiartorpoq, taamalu nunarsuup kissakkiartorneranut ilapittuutaalluni. Septemberip qaammataani sikup annertusiartortarnera minnerpaaffianiilerpat 2020-mi imaata sikua aatsaat taamak annikitsigissanersoq paasinarsiumaarpoq, tunngaviusorli ajortutut isikkoqarpoq, DMI tusagassiorfinnut nalunaaruteqarnermi erseqqissaavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER