DMI nittartakkaminik nutarsaasoq
DMI-p nittartakkani nutarsarsimavaa, taamaalillutik Nunatsinni sumiiffinni assigiinngitsuni amerlanerungaatsiartuni silassamut paasissutissat innuttaasut maanna pissarsiarisinnaalerpaat.
Nittartagaq nutaaq atuisunut ataasiakkaanut tassa Upernavimmi imaluunniit Narsami najugaqaruni sumiiffimmi silamut paasissutissanut tulluarsarneqarsinnaavoq, DMI-p tusagassiutinut nalunaarutaani allassimavoq.
Sumiiffiit 47-niit 601-inut
Sumiiffinni assigiinngitsuni amerlanerungaatsiartuni silassamut paasissutissat innuttaasut maanna pissarsiarisinnaalerpaat.
- Assersuutigalugu Nanortalimmiikkaanni, taava sumiiffimmut paasissutissat nammineq pissarsiarineqarsinnaalissapput. Tassa imaappoq, atuisut nittartagaq namminermut tulluarsarsinnaalissavaat, Marianne Thyrring DMI-nngaanneersoq oqarpoq.
Oqarasuaatini angallattakkani atorneqarsinnaasoq
DMI-p nittartagaq, qarasaasianut, tablet-inut kiisalu oqarasuaatinut angallattakkanut atorneqarsinnaasunngorlugu tulluarsarsimavaa.