DK-mi aningaasanut inatsit: Nunatsinni inunnik sullissinermut millionit

Ukiuni tulliuttuni imminut toquttarnerup pinaveersaartinneqarneranut 2,4 millionit koruuninik kiisalu meeqqat illuinik taagorneqartunut 16,9 millionit koruuninik aningaasaliisoqarpoq. Aammattaaq Danmarkimi kalaallit inuusuttut angerlarsimaffeqannginnerannut pitsaaliuinermut kiisalu Nuummi angerlarsimaffeqanngitsunut aningaasanik salliutitsisoqarpoq.

Danskit naalakkersuisui ataasinngornermi ullaakkut ukiunut tulliuttunut aningaasanut inatsimmik saqqummiussipput, Kalaallit Nunaannilu inunnik isumaginninnermik suliassaqarfimmut suliniutinut arlalinnut aningaasaliisoqarpoq, aamma Danmarkimi pitsaaliuinermik sulianut.

Atlantikup Avannaani aningaasat agguagassanik taaneqartartut isumaqatiginninniutiginerisa inernerisa tamanna takutippaa, tassani Nunatsinnit Folketingimut ilaasortat marluk sunniuteqartinneqarsimapput. Folketingimut ilaasortat taakku marluk Sermitsiaq.AG-mut taama ilisimatitsipput, aningaasat tamarmiusut agguataarneqarneri allaaserisap ataani takuneqarsinnaapput.

Ilaatigut piffissami 2022-2023-mi Nationale Sorgcenterimut (aliasuuteqartunut sullissivimmut) Kalaallit Nunaanni aliasuttunut attaveqarfimmut ukiuni marlunni misiliutaasussamut 2,4 millionit koruuninik tapiissuteqarnissamut immikkoortitsisoqarpoq. Aliasuttunut attaveqarfissaq Kalaallit Nunaanni imminut toquttarnerup pitsaaliorneqarneranut tapertaassaaq.

Tamatuma saniatigut misiliummik suliniummut meeqqat illuinik taagorneqartunut 16,9 millionit koruuninik aningaasaliisoqarpoq. Angerlarsimaffiit meeqqanut kannguttaatsuliorfigineqarsimasunut, meeqqanut najoruminartunik suliaqarfinnit assigiinngitsunit sulianik erseqqissaanissamik neqerooruteqartassapput.

Toqqissisimanartumik qulaajaaneq videukkullu apersuineq
Meeqqat illui folketingimut ilaasortap Aaja Chemnitz Larsenip (IA) kissaataasa pingaarnerit ilagisimavaat:

- Aningaasaliinernik nutaanik meeqqanut kinguaassiutitigut kannguttaatsuliortarnermut akiuinermik sulineq nukittorsarniarpara. Taamaammat meeqqat illuinik pilersitsinissamut 16,9 millionit koruuninik aningaasaliissuteqartitsinermut nuannaarutigaara, tassani meeqqap pisariaqartitai kisimik ukkatarineqartassapput. Meeqqat tassani avatangiisini toqqissisimanartuni qulaajaaffigineqarlutillu videukkut apersorneqartassapput, tassanilu amerlanerusunik uppernarsaateqartoqartalernissaa neriuutaavoq, meeqqanullu tulluartuunissaa ukkatarineqarnerussalluni, sullissisullu sukkasuumik meeqqamut ikiorsiillutillu katsorsaasapput, Aaja Chemnitz Larsen oqarpoq.

Politikerip oqarnera naapertorlugu pilersaarut malillugu, MIO innersuussineratigut meeqqat illuinik Tasiilami, Ilulissani Maniitsumilu pilersitsisoqassaaq. Suliniutip iluatsilluarnissaa ungasinnerusorlu eqqarsaatigalugu illoqarfiit tamarmik meeqqanut illoqalersinnaat neriuutigaa.

Angerlarsimaffeqannginnerup pitsaaliorneqarneranut aningaasat
Kalaallit Danmarkimiittut Kalaallit Nunaanniittullu angerlarsimaffeqanngittarnerannut pitsaaliuinermut aningaasanik immikkoortitseqataasimalluni, Folketingimut ilaasortap Aki-Matilda Høegh-Damip (S) erseqqissarpaa.

- Siumut Folketingimi Kalaallit Nunaanni aamma Danmarkimi angerlarsimaffeqanngitsut sullinnissaat pingaartippaa, Aki-Matilda Høegh-Dam oqarpoq.

- Kissaatitta amerlanerpaartaat isumaqatigiissuteqarfigaavut, ataatsimut isigalugu danskit naalakkersuisuinik suleqateqarnermut naammagisimaarparput, Aki-Matilda Høegh-Dam oqarpoq, uani danskit aningaasanut ministeriat Nicolai Wammen assiliseqatigaa.

Kalaallit inuusuttut Danmarkimi najugaqartut angerlarsimaffeqartannginnerannut pitsaaliuinissaut 4,9 millionit koruuninik immikkoortitsisoqarpoq, tamatuma saniatigut 8 millionit koruuninik Nuummi Kofoed Skolemut ukiuni sisamani tulliuttuni aningaasaliisoqarpoq.

- Kofoed Skolep 2016-imi Nuummi pilersinneqarneranilli angerlarsimaffeqanngitsut Danmarkimukartartut ikiliartorsimapput. Ajoraluartumilli kalaallit inuusuttut 18-25-it akornanni ukiullit Danmarkiliartartut amerleriarnerat takusinnaavarput. Danskit naalakkersuisui katillugit 8 millionit koruuninik Nuummi Kofoed Skolemut angerlarsimaffeqanngitsunut pitsaaliuinissamut aningaasaliimmata Siumup nuannaarutigaa, Aki-Matilda Høegh-Dam oqarpoq.

Powered by Labrador CMS