Disko Line: Teknik aamma silarlunnera ajornartorsiutinut pissutaasut

Teknikki aamma silap ajornera, Qeqertarsuup Tunuani angallassinermi ajornartorsiutit ilagaat.

Ulluni kingullerni isornartorsiuisoqarnerata kingorna Disko Line maanna akissuteqarpoq.

- Disko Linemit maluginiaqquarput, 26/1-19 aallarnerfigalugu ulluni 13-ini qulimiguulipput Bell 212 teknikkikkut ajoquteqarnikuunera – tamannalu ajoraluartumik taamaatitsiinnarnernik aamma kinguaattoornernik kinguneqarpoq, ingerlatseqatigiiffiup pisortaa Noëlle Simoud tusagassiuutinut nalunaarummi allappoq.

- Piffissami qulimiguullip Bell 212-ip qulingiluanik ilaasoqarsinnaasup teknikkikkut ajoquteqarnerani, ilaatigut silarlunnera pissutigalugu ilaasut tikiffissaminnut apuunneqarnissaat salliutinnikuuarput, taakkulu kingorna allakkat nassiussallu – taamatut tulleriiaarisussaaneq aamma kiffartuussinermut isumaqatigiissummi oqaatigineqarpoq. Piffissami qulimiguuliutitta Bell 212-ip ajoquteqarnerani qulimiguullit AS350-it marluk atorpagut, taakku immikkut sisamanik ilaasoqarsinnaapput, ajoraluartumillu allakkanut nassiussanullu inissaqarpallaanngillat.

Sila aamma kaperlannera

- Allakkat aamma nassiussat illoqarfinnut nunaqarfinnullu pineqartunut nassiussornissaat , Disko Linep maanna ilungersuutigaa. Suliassarli taanna ajornaatsuinnaanngilaq, silap allanngorarnera pissutaalluni. Pisinnaasarput naapertorlugu allakkanut nassiussanullu saniatigut angallassinernik aaqqissuussinikuuvugut – kingulliit sapaatiuppat nassiunneqarnissaat naatsorsuutigaarput. Sila, taarnerani killigitinneqartut aamma timmisartortartut sulinerisa akunneri pilersaarusiornitsinnut ilannguttussaavagut – taarnerani killigitinneqartut ingammik novembarimi, decembarimi aamma januaarimi killeqartitsisimapput.

- Sapaatip-akunnerata siuliani allakkat nassiussallu Qasigiannguanukartut nassarnikuuagut, sikunik aserorterinerup Qasigiannguanut angalatissinnaalernikuummatigut. Tamannalu aamma angaffinnut allanut soorunami misissornikuuarput, kisianni siku pissutigalugu tamanna periarfissaasimanngilaq – taamaattumillu saniatigut timmisartuussinerit salliutippagut, nassiussat piaarnerpaamik tikiukkusullutigit – angalanissallu pilersaarutaareersut nikisinnagit.

Peqqinnissaqarfiup ikiornissaanut piareersimasut

- Peqqinnissaqarfiup suliaqarnikkut allatigullu atortunik pisariaqartitsilluni, sukkanerusumik nassiussaqarniarlutik siornatigut attaveqarfigisareerpaatigut, peqqinnissaqarfiullu nakorsaatit piaartumik pisariaqartinneqartut pillugit, sapinngisarput atorlugu kiffartuunnissaanut piareersimajuarpugut.

- Aasaanerani Disko Line aqqutigalugu angalaniarneq ajornarluinnangajattoq aamma oqaatigineqarpoq. Innuttaasut takornarissallu Disko Linemi bilitsisinissamut assigiinnik periarfissaqarput. Inissaatigut tamarmik pisiarineqarnissamut ammapput, nittartakkakkut, allaffigut imaluunniit angalatitsiviit assigiinngitsut aqqutigalugit. Aasaaneranilu Disko Line umiatsiamik aqqutinik amerlanerusunik ilanngussinerusarpoq, piffissami qaninnermi inissaaruttoqarsimatillugu imaluunniit aaqqissuussanik saniatigut angalanissanik piffissami aalajangersimasumi pisariaqartitsisoqartillugu aamma taamaaliorusuttarput.

- Innuttaasunik puigugaasoqanngilaq. Disko Linep ilaasut tikiffissaminnut sukkasuumik aamma isumannaatsumik tikinnissaat sulissutigiuaannarpaat. Teknikkikkut ajoquteqartoqarnerata aamma silarlunnerata kingorna kinguaattoortoqartillugu ilaasut piaartumik illoqarfinnut nunaqarfinnut apuunniarnissaat sulissutigiuaannarparput, kingornalu allakkat/nassiussat.

- Tamatuma saniatigut Disko Linep oqaatigerusuppaa, pissuteqanngitsumik qulimiguulinnik taamaatitsisoqarneq ajornera. Teknikkikkut ajutoorneq imaluunniit silarlunnera pissutaallutik, isumannaallisaaneq tunngavigalugu timmisartortartut timmisartuussinnginnissartik aalajangiuttarpaat.