Disko Line isumaqatigiittoqareersoq: Umiarsuaaqqamik sanatitsissaagut
Kiffartuussinissamut isumaqatigiissutit nutaat tunngavigalugit Disko Line ukiuni qulini Qeqertarsuup Tunuani, Kalaallit Nunaata Kitaani, kiisalu Kalaallit Nunaata Kujataani angallatinik angallassinissaminut isumaqatigiissusiorsimavoq.
Kiffartuussinissamut isumaqatigiissutit nutaat ukiunik qulinik sivisussuseqartut atsiorneqarnerisigut Disko Line erngerluni umiarsuaaqqamik sukkasuumik saviminermik sanaasumik inunnik 36-inik ilaasoqarsinnaasumik, sikusiorsinnaasumik sanatitsissaaq.
Disko Linemi pisortaq Noëlle Simoud tusagassiutinut nalunaarummi allappoq. Naalakkersuisut ilaasunik angallassinermi kiffartuussinissamut isumaqatigiissutit akueraat ippassaq tallimanngormat.
Ilaasut amerlanerusut
Umiarsuaaraq taanna Nunatta Kujataani angalalertussaassaaq. Umiarsuaaqqap taassuma 2022-ip naalernerani naammassineqarnissaa pilersaarutaavoq.
- Umiarsuaaraq sukkasuuliaq Nunatta Kujataani angalalertussap kingunerissavaa taarsereernerani inuit amerlanerusut Narsarsuarmiit angallanneqarsinnaalernissaat, kiisalu ukiuunerani toqqissisimanarnerusumik angalasinnaanissaq anguneqassalluni, ilisimatitsissutigineqarpoq.
Disko Line decembarip aallaqqaataa aallarnerfigalugu Nunatta Kujataani Najaaraq Ittuk ukiuunerani angallassinissaanut pilersaarusioreerpoq.
Ukiup nutaamit atuuttussat
Ilaasartut, najukkamut uppernarsaat apeqqutaatinnagu kinguaattoortoqartillugu taamaatitsiinnartoqartilluguluunniit ullormusianik imaluunniit ineqarnermut nerisaqarnermullu, kiisalu mittarfimmiit/talittarfimmiit najugaqarfimmut aningaasartuutit isumagineqartassapput.
- Aallariartorlutit takkussimaguit, tassanngaanniillu Disko Line-ip aallarnissaanut kinguaattoortoqarpat taamaatitsisoqarpalluunniit: Disko Line-mut bilitsit saniatigut aningaasartuutitaqanngitsumik aallarfissamut inissalimmut tullermut allanngortinneqassaaq.
- Disko Line-ip angallassinissaa kinguaattoorpat, tamatumalu kingunerisaanik Aasianni, Ilulissani, Narsarsuarmi, Nuummi, Sisimiuni imaluunniit Maniitsumi timmisartumik/qulimiguulimmik ingerlaqqiffissat annaagukku, timmisartuutileqatigiiffimmi ilaaffissami aallarnissamut inissalimmut tullermut ilaallutit aallarnissavit tungaanut nerisaqartinneqarnerit akilerneqassaaq.
- Timmisartumut ingerlaqqiffissannut bilitsit annaagukku imaluunniit akeqanngitsumik aallarfissamut tullermut allanngortissinnaanngikkukku, ornitassannut allannguinermut imaluunniit Island-imi Danmark-imilu apuuffissannut siullermut bilitsimik nutaamik pisinissamut aningaasartuutit matussuserneqassapput. Taamatut pisoqassappat Disko Line attavigissavat.
- Aasiannut, Ilulissanut, Narsarsuarmut, Nuummut, Sisimiunut Maniitsumullu timmisartut/qulimiguullit angallassinerini kinguaattoornermi, taamaalillutillu Disko Line-i aqqutigalugu ingerlaqqiffissat annaagukku: Taamatut pisoqartillugu Disko Line-imut bilitsit aallarfissamut tullermut saniatigut aningaasartuutitaqanngitsumik allanngortinneqassaaq.