Disko Line ilaasumit isornartorsiorneqarpoq

Hasigne S. Brobergip Kangaatsiamit Aasiannut ippassaq sisamanngormat angalanissaralua Disko Linemit taamaatiinnarneqarmat tupaallappoq. Taanna Kommune Qeqertalimmi suleqatinilu Kangaatsiamiipput januaarip 16-anili.

Kinguaattoortoqareernerata kingorna Disko Line nalunaarpoq, ilaasut sumi unnuissanersut ikiorserneqarsinnaanngitsut.

- Taamatut oqartoqarnera eqqarsarnarpoq, taamatullu sullissisoqarsinnaanera apeqqusernaqaaq. Silarlunnerami uagut pisuussutiginngilarput, Disko Linep taamaasilluni sumi unnuissanersugut ikiorsertussaagaluarpaatigut - taamatut sullissisoqarsinnaanngilaq, Hasigne S. Broberg Sermitsiaq.AG-mut oqaluttuarpoq.

Silami sininnissamik innersuunneqarneq

Disko Linemit taamatut nalunaartoqareersoq Hasigne S. Brobergip suleqatinilu sumi unnuissanerlutik nammineerlutik misissuipput.

- Silami sininnissarput innersuunneqareersoq nammineerluta sumi unnuissanerluta ujartuivugut, atorfippullu aqqutigalugu unnuiffissatsinnik nassaarluta, oqarpoq.

Nammineerlutik angalasimasuugunik susoqarsimassagaluarnersoq isumaliutigaa.

- Kangaatsiami nalunngisaqanngilanga. Susoqarsimassagaluarpamita nammineerlunga angalasimasuuguma?, aperaaq.

Silarluttoq

Silarlunnera pissutaalluni angalanissaraluit taamaatinneqanngikkunik kinguartinneqarsimasut Disko Line tusagassiutinut nalunaaruteqarpoq.