Disko Line A/S sakkortuumik isornartorsiorneqartoq
Disko Line A/S-p takornarissanik sullissinneq ilaasunik angallassinermut naleqqiullugu annertuallaartumik aallukkaa, tanmannalu inissat ulikkaaqqasut amerlavallaartarnerannik peqquteqartoq, atuisut takornarialerisorlu isumaqarput.
2020-mi Namminersorlutik Oqartussat Disko Line A/S-imik ukiuni qulini atuuttussamik 237,6 millioner koruuninik aningaasartaqartumik kiffartuussinermut isumaqatigiissuteqarput. Kiffartuussinermut isumaqatigiissummi Qeqertarsuup Tunuani, Kalaallit Nunaata Kitaata qeqqani Kujataanilu ilaasunik angallassisarnissamut isumaqatigiissuteqartoqarpoq. Taamatut isumaqatigiissuteqarnermi Disko Line A/S ukiunik arlalinnik siumut isigisumik pilersaarusiorsinnaanissaa aningaasaliisinnaanissaalu, minnerunngitsumillu takornariaqarnermik inerisaanissaa pingaartinneqarpoq. Disko Lineli maannakkumut takornariaqarneq pingaartinnerullugu ingerlatsisoq, atuisit takornarialerisorlu isumaqarput.
Aviisi Sermitsiaq taama allappoq.
Topas Explorer Group ApS-ip suliffeqarfiit arlallit pigivai, taakkununngalu Disko Line A/S, Ilulissani Hotel Icefiord A/S aamma Qeqertarsuarmi Hotel Disko Island A/S ilaapput. Hotel Disko Island A/S-p paasissutissiinera naapertorlugu aasaq manna takornarissat Disko Linep angallataanut Targanut ilaallutik Qeqertarsuarmut tikittartut aasaq manna amerlasoorujussuusimapput, taakkulu ilaatigut angalatitsivik Topas Explorer Group ApS aqqutigalugu tikittartut oqaatigineqarpoq. Aasaanerani ulapaarfimmi Qeqertarsuarmiik Qeqertarsuarmillu Targa atorlugu aqqutit 41 procentii naliginnaasumik ulikkaaqqasartut, Disko Line A/S-imit oqaatigineqarpoq.
Angalaffissallu amerlasuut ulikkaaqqasarneri Qeqertarsuarmi atuisunit arlalinnit mamiasuutigineqarpoq, pissutsillumi taamaannerat ilisimagitsik, Ilulissani takornarialerisoq oqarpoq. Takornarissanillu kiffartuussinerup annertuallaarneranik peqquteqartumik ilaasunik angallassineq Disko Line A/S-p naammaginartumik naammassisinnaanngikkaa, taakku isumaqarput.
Aviisimi Sermitsiami atuarnerusinnaavutit. Aviisi uani pissarsiariuk: