DIIS: USA-p siunnerfimminik allannguinera naalagaaffeqatigiinnut unammillernartoq

USA-p Issittumi suliaqarnini annertusisimavaa, USA-millu piumasaqaatigineqartut naalagaaffeqatigiit naammassiuminaatsissinnaavaat. USA-mit piumasaqaatigineqartut aamma naalagaaffeqatigiit suleqatigiinnerannut akornusiisinnaapput, ilisimatuut naliliipput.

Ilisimatuut Danmarkimi nunanut allanut ministeeriaqarfiup suliakkiuteqarneratigut, Issittumi isumannaallisaanermi politikkikkut inissisimanermik misissueqqissaarsimapput, misissueqqissaarnermilu angusat ataasinngormat ullup-qeqqanut saqqummiunneqarput.

Ilisimatuut inerniliussaasa ilagaat,USA-p Issittumi naalagaaffiit pissaanilissuit pissaaneqarniunneranni siunnerfigisimasanik allannguisimanera naalagaaffeqatigiinnut annertuumik sunniuteqarsimasoq:

- Ruslandip Kinallu issittumi sammisaqarneruleriartornerat ernumanarsinnaagaluartoq, Kunngeqaffimmut unammillernarnerpaassaaq nammineq iligisanit piumaffigineqarneq, assesuutigalugu kiniiserit aningaasaliissutaannut tunngatillugit, nammineq oqartussaaffigisanik sakkutuullu sakkussiornerunerannik pitsaanerusumik nakkutiginninnissaq, Mikkel Runge Olsenen DIIS-imi seniorforskeri suliniummik aqutsisuusimasoq oqarpoq.

Nunat tamarmik namminneq soqutigisaqartartut

Isumannaallisaanermulli politikki nutaaq naalagaaffeqatigiinni nunanut ataasiakkaanut assigiinngitsumik sunniuteqarpoq, nunallu tamatigut assigiimmik soqutigisaqarneq ajorlutik:

- Kalaallit Nunaat Savalimmiullu attaveqaasersuutitigut isumalluutinillu piiaanissamut qularnaatsumik aningaasaliissuteqartoqarnissaanik annertuumik soqutigisaqassapput, aamma rusiit kiinamiullu niuerfiinut tunisaqartarnissap qulakkeerneaqarnissaa eqqarsaatigalugu - pingaartumik aalisarnerup iluani. Taakkuninnga eqqarsaatiginninnerit Kunngeqarfiup isumannaallisaanermi politikkikkut pingaarnertut soqutigisaanut iligiittullu eqqarsaatigisassaanut akerliussappata, tamanna ajornartorsiutaalersinnaavoq.

- Taamaammat pingaaruteqarluinnarpoq, naalagaaffeqatigiit taakku pingasut iluminni ajornartorsiutinik aaqqiissuteqartarnissaat, Kunngeqarfik Danmarki nunanut allanut politikkimi ataatsimoortututu inissisimassappat, Mikkel Runge Olesen oqarpoq.

Peqataatitsinerusarnissamik inassuteqartut

Ilisimatuut tamanna tunngavigalugu marlunnik inassuteqarput, Kunngeqarfiup Issittumi inissisimaffimmik nutaamik isumaginninnissaanut ikiuutaasinnaasunik:

Danmarkip, Kalaallit Nunaata Savalimmiullu akornanni nunanut allanut isumannaallisaanermullu politikkimut tunngasutigut peqataatsitsinerunissamik paasissutissanillu aviteqatigiittarnissamik maanna siunnerfeqarneq ingerlatiinnarlugulu nukittorsarneqassasoq

Issittumi Atlanatikullu avannaani nunat allamiut aningaasaliissuteqartarnerat eqqarsaatigalugu Naalagaaffeqatigiinni ataqatigiimmik ingerlatsisoqarissaa pillugu oqaloqatigiinneq nukittorsarneqassasoq

Ilisimatuut naapertorlugit, nunanut allanut isumannaallisaanermullu tunngasutigut Kalaallit Nunaat peqataatinneqarnerusalereerpoq:

- Nuummiit tusakkakka malillugit, socialdemokraatit naalakkersuisuutitaqarnerat naammagisimaarneqarpoq. Siusinnerusukkut danskit naalakkersuisorisartagaannut sanilliullutik peqataatitsinerunerat pissutigalugu, Rasmus Leander Nielsen Ilisimatusarfimmeersoq oqarpoq.

Lynge peqataatitsinermut qujassuteqartoq

Inassuteqaatit saqqummiunneqarneranni nunanut allanut naalakkersuisunngorlaaq Steen Lybge (D) video aqqutigalugu peqataavoq.

Steen Lyngep, danskit nunanut allanut ministeriat saqqummiinermi najuuttoq, misissueqqissaartoqarnerani kalaallit soqutigisaannik ilanngussisisimanera pillugu qujaffigaa.

Powered by Labrador CMS