nalunaarusiaq
Digitalinngortitsineq sipaaruteqartitsivoq
Naalakkersuisut ukiumoortumik 2014-imut digitalinngortitsinermut nalunaarusiaat saqqummeqqammerpoq, taassumalu ilaatigut takutippaa digitalinngortitsineq pisortat ingerlataqarfiini sipaaruteqartitsisoq
Naalakkersuisut digitalinngortitsinermi periusissiaminni - ‘Digitalinngortitsineq ingerlatsissutitut’ - suliniutit 37-t piviusunngortippaat, pingaarnertut sammisani arfinilinni agguarneqartuuni. Politikerit 2014-ip ingerlanerani suliniutinit taakkunannga arfinillit atulersinneqarpaat. Tamanna digitalinngortitsinermut periusissap ukiumoortumik nalunaarutaani takuneqarsinnaavoq.
- Maanna takusinnaalereerpagut digitaliseeriinerup iluaqutissartai, tassaasut pisortat allaffissorneranni sipaarutit, tassa innuttaasut pisortanik attaveqarnerminni tele atorlugu nakorsiartinneqarnerminni peqqinnissatigut pitsanngorsaaffigineqarnerat, aningaasaqarnermut naalakkersuisoq, Andreas Uldum, tusagassiuutinut nalunaarummi erseqqissaavoq.
Suliniutit
Suliniutit naammassereersut ilaat video atorlugu attaveqatigiinneq, angalanernut atugassanut ikilititsisoq, ataatsimiinnerit pisariinnerusut, suleqatigiinnermut periarfissat pitsaanerusut, isorliunerusuni allanilu ilisimasalinnik ikiorneqarnissamut periarfissaqalerneq.
2014-ip sisamararterutaasa pingajuanni innuttaasut IT-mik atuinerat naliliisarluni misissuiffigineqarpoq. Ukiuni tallimani kingullerni allanngoriartorneq ingerlaqqippoq, assersuutigalugu innuttaasut 77 procentii 2014-imi angerlarsimaffimminni internetimut isersinnaapput. 2013-imut naleqqiullugu 28 procentinik annertuseriarneruvoq.
Aamma 2014-imi innuttaasut 63 procentiisa digitaliunerusumik attaveqartarnissartik ujartorpaat.
Naalakkersuisut nuna tamakkerlugu digitalinngortitsinermi periusissiaat 2014-2017 pillugu nalunaarusiami uani atuarsinnaavat.