Ilinniakkamik naammassisoq
Digitalimik atuilluartut soraarummeerput
Digitaliusumik nittarsaassineq Minik Hansenip aqqutissarsiffigaa maannalu Niuernermik Ilinniarfimmi nunani tamalaani niuernermi takoqqusaarnermilu akademimerkonomitut naammassivoq
28-nik ukiulik Minik Hansen akademimerkonomitut allagartaminik nuannaarutiginninnissamut pissutissaqarluarpoq. Ukiut marluk matuma siorna sungiusaammik suliffissaarukkaluarpoq ullumikkulli akademimerkonomitut naammassilluni.
Sulisunik sullissinermik ingerlatsisoq Suliplus sungiusaammik suliffigineqarnissamik akuersimmat suliffeqarfik digital atorlugu nittarsaanniarlugu Minik Hansen aallartippoq taamalu Nunatsinni nunanilu allani saqqumilaartillugu.
- Ullutsinni nutaaliaasuni digitalimik takoqqusaarnissaq aqqutissaavoq. Suliffeqarfeeqqamut Suliplusitut ittumut digital atorlugu sulinissaq pisariaqarpoq taamalu pisinnaasat tamanna aqqutigalugu saqqummiullugit, Minik Hansen nassuiaavoq.
Digitalimik nittarsaaneq pillugu soraarummeerusiorsimavoq. Sungiusaammik sulinermini misilittakkani atorsimavai maannalu aalangersimasumik Suliplusimi atorfinitsinneqarluni.