Diesel kuussimasoq: Dieseli 40.000 literi tatsimit qaqinneqartoq
Kulusummi tallimanngornermi dieseli 120.000 literip missaaniittoq kuussimavoq. Politiit ilisimatitsissutigaat, dieseli tamarmiusoq maanna katersorneqarsimalersoq.
Politiinit nalunaarutigineqarpoq, Kulusummi dieseli 120.000 literip missaaniittoq tallimanngornermi kuulersimasoq maanna iluarsiiffigineqartoq.
- Mittarfeqarfinnit Upalungaarsimasunillu sukkasuumik qisuariartoqarneratigut ajoqusertut killilersimaarneqarput.
- Saliinermi ilaatigut dieseli tankemut immiunneqarpoq. Dieseli tamarmiusoq taamaalilluni qaqinneqarluni - ilaatigut 40.000 literip missaaniittoq tatsimit qaqinneqarpoq, pigaartut pisortaat Jens Rønberg tusagassiorfitsigut nalunaaruteqarluni allappoq.
Dieseli nunamit kuulersimavoq, uuli tatsit ilaannut seerisimalluni ilaalu imaanut seerisimalluni.
Najugaqartut peqqissusaannut ulorianaateqanngitsoq
Qatserisartut, politiit, kommunimi oqartussat Mittarfeqarfiillu tallimanngornermi Kulusummi silarlukkaluartoq dieselip pinngortitamut kuunnera killilersimaartinniarlugu ulapissimapput.
- Dieselip kuussimanera nunaqarfimmi najugaqartut peqqissusaannut uloriananngitsoq nalilerneqarpoq, aamma imaani uumasunut naasunullu piffissaq ungasinnerusoq eqqarsaatigalugu sunniuteqassanngitsoq nalilerneqarpoq, pigaartut pisortaat nangilluni allappoq.
Taassuma ilisimatitsissutigaa, qatserisartut, politiit, kommunimi oqartussat, Issittumi Sakkutooqarfik, Pinngortitamut Avatangiisinullu Naalakkersuisoqarfik Mittarfeqarfiillu arfininngornermi ataatsimeeqatigiissimasut.
-Ataatsimeeqatigiinnermi pisoq misissorneqarpoq, oqartussanillu nalilerneqarpoq saliineq - sumiiffimmi silarlukkaluartoq maanna naammassineqartoq. Ajutoortoqarneratigut ukiuunerani dieselissaqartitsineq sunnerneqassanngilaq, Jens Rønberg allappoq.