Skip to main content

DF: Naalagaaffeqatigiinni tamani pinngitsoorani sakkutuujusussaaneq pillugu piumasaqartoq

Savalimmiormiut kalaallillu danskit allat assigalugit sakkutuujusariaqarput. Dansk Folkepartiimit folketingimi ilaasortat allatut isummertinniarneqaqqinniarput

Dansk Folkepartiip savalimmiormiut kalaallillu pinngitsooratik sakkutuujusarnissaat 2006-imi siunnersuutigigaluarpaa. Ukiut qulit qaangiummata Dansk Folkepartii tamannarpiaq pillugu aalajangiiffigisassatut siunnersuuteqaqqippoq, folketingimili ilaasortanit taperserneqarani.

Dansk Folkepartii maanna misileeqqippoq. Partiimi 2016-imi siunnersuummut assigugumik aalajangiiffigisassatut siunnersuuteqarpoq.

Siunersuuteqartup Søren Espersenip tunngavilersuutigaa, sakkutuujusussaaneq pillugu inatsit 1952-imeersoq savalimmiormiut kalaallillu sakkutuujusussaannginnerannik imalik ullutsinnut naleqqukkunnaarsimasoq. Inatsit pineqartoq 1912-imi aalajangersakkanik tunngaveqarpoq.

- Savalimmiormiut kalaallillu sakkutuujusussaannginnerannik aalajangersagaq sakkutuujusussaaneq pillugu qanga inatsimmit tunngaveqarpoq. Taamanerniilli allanngortoqarsimaqaaq, pingaartumik ukiuni kingullerni inuaqatigiit taakku marluk namminersorlutik oqartussaasut suliassaqarfinnillu arlalinnik angerlaassisimasut ineriartorluarsimaqaat, Søren Espersen siunnersuummini allappoq.

Isumannaallisaaneq pillugu politikki allanngortitsisoq

Dansk Folkepartii 2016-imisulli allappoq, Kalaallit Nunaanni Namminersorneq pillugu Isumalioqartigiissitarsuaq 2003-mi nalunaarusiamini allassimasoq,  sakkutuujususaaneq inuiaqatigiinnilu pisussaaffeqarneq atuutsinneqalertariaqartut.

Partiimit ilanngullugu oqaatigineqarpoq, Illersornissamut Ministeeriaqarfiup 2016-imi misissoqqissaarsimagaa, Issittumi siunissami suliassanik isumaginnittarnissaq. Tassani innersuussutigineqarpoq, Illersornissaqarfimmi Upalungaarsimasunilu suliassat isumagineqarnissaannut kalaallinik atorfinitsitsisinnaaneq peqataatitsisinnaanerlu atorneqanngitsoq. Kalaallit Nunaanni sakkutuunngorniarfimmik pilersitsiniarluni misiligummik suliniuteqartoqassasoq siunnersuutigineqarsimavoq.

Savalimmut Kalaallillu Nunaat nunanut allanut sillimaniarnermullu politikkimut peqataatinneqaraluttuinnarneranni piumasaqaataasariaqarpoq naalagaaffeqatigiinni tamani sakkutuujusussaanerup atuutsinneqarnissaa, Søren Espersen oqarpoq.

- Taamatut pitsaasumik ineriartortoqarnera eqqarsaatigalugu, Dansk Folkepartii isumaqarpoq, pissusissamisoortoq kalaallit savalimmiormiullu suli sakkutuujusussaannginnerat naapertuunnersoq misissussallugu. Uagut isitsinni naalagaaffeqatigiinni inuiaat taakku pingasut tamarmik illersornissamut upalungaarsimanermullu peqataasariaqarput, Espersen allappoq.


Savalimmiut sinnerlugit folketingimi ilaasortat naaggaartut

Dansk Folkepartii kingullermik siunnersuuteqarmat Savalimmiunit folketingimi ilaasortaatitat tapersersuinngillat. Taamanikkut Sjúrður Skaale Javnaðarflokkurinimeersoq aamma Magni Arge Tjóðveldimeersoq siunnersuummut akerliullutik taasipput.

Sjúrður Skaale suli folketingimi ilaasortaavoq, taasumalu isummani allanngortissimanngilaa.

- Isumaani tunngaviusoq paasisinnaavara, Savalimmiummi NATO-mit illersorneqarpoq illersorneqarnerminullu akiliuteqarneq ajorluni. Danmarkilli inuit sorsuffinnut ingerlatikkaagamigit, Savalimmiut sunniuteqarneq ajormat siunnersuut tapersersorsinnaanngilara, Sjúrður Skaale, Javnaðarflokkurin sinnerlugu folketingimi ilaasortaq oqarpoq.

Aalajangiiffigisassatut siunnersuut folketingip aasaanerani unikkallannginnerani siullermeerlugu suliarineqassaaq. illersornissamut Minisgteeriaqarfiup ukiut pingasut matuma siorna nalilersimavaa, sakkutuujusussaanerup annertusineqarnera 1,5-3,5 millioner koruuninik akeqassasoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER