DF: Siammasissumik naalakkersuisooqatigiittoqarnera Kalaallit Nunaannut kisimi iluaqutaassaaq

Kalaallit Nunaanni amigartoorfiusumik aningaasarsiortoqarpoq, pitsaanerusumullu tamanna saatinneqarnissaa imaaliallaannaq tikinneqarsinnaanngilaq. Taamaattumik siammasissumik naalakkersuisooqatigiittoqalertariaqarpoq.

Kalaallit Nunaat pillugu Dansk Folkepartiip oqaaseqartartua Søren Espersen oqarpoq.

Siumut pingasunik Inatsisartuni ilaasortaatitaqaleraluartoq partii suli Kalaallit Nunaanni Inatsisartuni anginerpaavoq.

Kim Kielsen siuttoralugu Siumut Naalakkersuisooqatigiinnissamut isumaqatiginninniaqqaassaaq. Siumut amerlanerussuteqalaarluni naalakkersuisuutitaqalernissaa Søren Espersenip neriuutiginngilaa.

- Danmarki assingusumik aningaasarsiornikkut inissisimasuuppat siammasissumik naalakkersuisuutitaqalersimassagaluarpoq. Partiit anginerit pingasut naalakkersuisuutitaqalersimassagaluarput. Kalaallit Nunaanni taamaaliortoqartariaqaraluarpoq. Taamaanngippat Kalaallit Nunaata aningaasaqarnera isasoorsinnaavoq, Søren Espersen Ritzauimut oqarpoq.

Nunap inissisimanera politikkerit ilisimavaat?
Nunatta karsiata inissisimanera sapaatip akunnerata kingullermi saqqummiunneqarpoq. 2014-mi aningaasaqarneq 275 million koruuninit amerlanerusunit amigartooruteqarnissaa naatsorsuutigineqarpoq. Isertitassatut naatsorsuutigineqarsimasut ikinnerunerat pissutaalluni aningaasaqarneq taamatut inissisimavoq, naatsorsuutigineqarsimagaluarpormi 21 million koruuninik sinneqartoortoqassasoq.

- Amigartoorutit amerlasoorujussuupput. Aningaasaqarnerup taamatut ingerlanerani partiit ataatsimoortariaqarput. Siammasissumik naalakkersuisoqalernissaq pisariaqartinneqarpoq.

- Kalaallit Nunaanni politikkerit siammasissumik naalakkersuisoqalinngikkunik politikkeriisa ilisimasimanavianngilaat susoqarnersoq, Søren Espersen oqarpoq.

Inuit Ataqatigiit, Sara Olsvig siuttoralugu, Siumut assigalugu aqqanilinnik Inatsisartunut isertitaqarput.

Partiit taakku suleqatigiissinnaanngippata Kim Kielsen Atassut aamma Partii Naleraq suleqatigilersinnaavai. Naalakkersuisunut siornatigut siulittaasuusimasoq Partii Naleqqami siulittaasuuvoq, tassa Hans Enoksen.

Partii Naleraq pingasunik Inatsisartunut isertitaqarpoq Atassut marlunnik isertitaqartoq.