DF-ip meeqqat pinngitsaaliissummik Danmarkimut peertittarniarpai
Meeqqanut kinguaassiutitigut kannguttaatsuliorfigineqartunut tunngatillugu DF-ip Kalaallit Nunaannut arsaarinnissuteqarfiginiarpaa
Meeqqat 1995-imi inunngortut tallimararterutaat kinguaassiutitigut kannguttaatsuliorfigineqarsimasarput, Innuttaasunik misissuinerup 2018-imit kisitsisit nutaat tamanna takutippaat.
Ingammik Tunumi ilungersunarpoq, innuttaasut 60-it ataallugit ukioqartut Tasiilap pigisaaniittut affaat peroriartornerminni kinguaassiutimikkut kannguttaatsuliorfigineqarsimallutik oqaluttuaraat.
DR-imi piviusulersaarummi ataasinngornermi unnukkut aallakaatinneqartussami tamanna takuneqarsinnaavoq.
Danskit oqartussat sakkortuumik iliuuseqartariaqarput, Kalaallit Nunaannut tunngasunik oqaaseqartartoq Søren Espersen (DF) isumaqarpoq.
Dankmarkip Kalaallit Nunaat akisussaaffimmik arsaarinnissuteqarfigisariaqaraa, taanna isumaqarpoq.
- Kalaallit oqartussat ajorsarput. Danskit naalagaaffiat taarserartunik isumaginninnermut ministereqartoq namminersorlutik oqartussanut ikiorsiinissamut neqeroortarput, kisianni tamanna itigartinneqartarpoq.
- Danmark meeqqanut aamma meeqqanut tunngatillugu isumaqatigiissummut malinneqanngitsumut pisussaaffeqarpoq, Søren Espersen oqarpoq.
Danmarkip isumaginninnermut ministeria suliamut ilisimasalinnik Kalaallit Nunaannut aallartitsisariaqartoq, taanna isumaqarpoq – politiit, oqartussat aamma isumaginninnermik suliaqartut ilanngullugit.
- Vordingborg Kommunemi taamatut pisoqaraluarpat iliuuserineqartussaq iliuuserineqassaaq, Søren Espersen taama oqarpoq.
Meeqqat kinguaassiutitigut kannguttaatsuliorfigineqarsimasut angajoqqaarsianut Kalaallit Nunaanni Danmarkimiluunniit pinngitsaaliissummik peerneqartarnissaannut periarfissamik aamma ammaasserusuppoq.
Siunnersuut taanna atorsinnaanngilaq, Peqatigiiffik Kalaallit Meerartaanni pisortaq Puk Draiby isumaqarpoq.
- Tamatuma aaqqiissutaaneranik eqqarsarneq eqqumiilluinnarpoq. Meeraq kalaallit kulturianni peroriartortoq aamma kalaallisut oqaaseqartoq ajoquserneqassaaq, Puk Draiby oqarpoq.
Pisortap oqarnera naapertorlugu qallunaanngorsaanermut assinguvoq, tassani kalaallit meerartaat 1950-ikkunni Danmarkimut aallartinneqartarsimapput.
- Inuppassuit sorlaqarfitik annaagamikkit naqqammipput, Puk Draiby oqarpoq.
Danskit oqartussat ataasiakalaaginnarlutik Kalaallit Nunaannut aaqqiissutissaqarlutik angalasinnaanngitsut, taanna isumaqarpoq.
Taarsiullugu ajornartorsiutip Kalaallit Nunaanni iluarsineqarnissaa taanna isumaqarpoq, siorna ”Kinguaassiutitigut atornerluinermut periusissiamik” suliaqartoqarpoq, taanna ukiuni sisamani atuutissaaq.
Tamatuma saniatigut Peqatigiiffik Kalaallit Meerartaasa atoqatigiinneq pillugu atuartitsisarnerup siammarterneqarnissaa suliaraa, tassani meeqqat killiliinissamut ilinniartinneqassapput, aamma kinguaassiutitigut atornerluinerit pillugit oqallisilernissaannik siunertaqartoqarpoq.
Kalaallit Nunaanni meeqqat atugaannut tunngatillugu Danmarkip akuliunnissaannut tunngatillugu Søren Espersen oqariartuuteqarnerminik siullermiilinngilaq. 2017-imi oqaluttuarisaanermik ilisimasallip Thorkild Kjærsgaardip isumaginnittoqarfimmut tunngatillugu Namminersorlutik Oqartussat atorunnaarsinneqarnissaannut siunnersuutaanik tapersiinikuuvoq.
- Kialuunniit eqqarsarluarsinnaasup tamanna isumassarsiatsialaanngitsoq takusinnaavaa, Kommuneqarfik Sermersuumi borgmesteri, Asii Chemnitz Narup (IA) taama qisuariarpoq.