Thule Air Base
DF-imeersup Espersenip Kalaallit Nunaat aningaasannanniarluni tatisinerarlugu unnerluuppaa
USA-p nunatsinniinnermini akiliuteqarnissaanik Kalaallit Nunaata piumasaqaataa assortuussutaavoq
Nunanut allanut politikkikkut tunngasunut ataatsimiititaliap siulittaasuata Søren Espersenip, Dansk Folkepartimeerup, Thule Air Basep atorneqarneranut amerikarmiut akiliisalernissaannik Kalaallit Nunaata piumasaqaataa akaarinngilluinnarpaa.
Akuerineqarsinnaanngilaq
DF-imi politikerip taamatut USA-mut Danmarkimullu nalunaaruteqarneq taavaa ´akuerineqarsinnaanngilluinnartutut´. Aamma pissutigalugu Naalakkersuisut sioorasaarimmata qallunaat amerikarmiullu Kalaallit Nunaata illersorneqarnissaanik isumaqatigiissutaata, kingornalu tassunga ilassutit isumaqatigiinniutigineqaqqinnissaat piumasariniarlugu.
– Tamanna (illersornissamut isumaqatigiissut, aaqqiss.) Kalaallit Nunaata puiguinnarsinnaavaa. Tamanna aningaasannarniarneruvoq tatisiniarnerullunilu sumilluunniit tunngavissaqanngitsoq. USA-p Kalaallit Nunaat ukiuni 75-ini illersorlugulu sernissorsimavaa, ilaatigut Sorsunnerup Nillertup nalaani, tamannalu pissutigalugu Kalaallit Nunaata USA qutsavigisariaqarpaa. Amerikarmiut pisorpassuit nalaanni Kalaallit Nunaannittarsimavoq - namminersornerullutik oqartussat, namminersorlutik oqartussat kalaallillu oqartussaasui ikiortarlugit.
Isumaqatigineqarluarpoq
Inatsisartut Nunanut Allanut Tunngasunut Isumannaatsuunermullu Ataatsimiititaliaata aammalu Nunanut Allanut Tunngasunut Naalakkersuisup Vittus Qujaukitsup, siunniuppaat Kalaallit Nunaata piumasarissagaa illersornissamut isumaqatigiissutit isumaqatigiinniutigineqaqqissasut.
Kiffartuussinissamik isumaqatigiissut
Taamatut nalunaaruteqartoqarpoq ilaatigut pissutigalugu paasinarsimmat selskabip amerikarmiunit pigineqartup Exelis Servicesip, Thule Air Basemi kiffartuussinissamik isumaqatigiissut selskabimit namminersorlutik oqartussanit ilaannakortumik pigineqartumit Greenland Contractorsimit tigussagaa, ilaatigullu pissutigalugu nutaamik sammineqalermat amerikarmiut Kalaallit Nunaanni sumi tamaanisakkutooqarfigisimasaanni qimanneqarsimasuni mingutsitsisoqarsimasinnaasoq.