Tunu
Destination East Greenlandimi siulittaasoq nutaaq
Siulittaasunngortoq Tasiilami najugaqavissoq, ukiumi nutaami aallartissaaq
Tunumi nakorsaaneq, Hans Christiani Florian Sørensen, januaarip aallaqqaataa 2016 aallarnerfigalugu aningaasaateqarfimmi Destination East Greenlandimi siulersuisunu siulittaasunngussaaq.
Taassuma kommunalbestyrelsimi ilaasortaq Allan Pertti Frandsen (IA) taarsissavaa.
Kommunimi politikeriunngitsut
Taarsersuineq aamma allannguinermik malunnaateqarpoq, tassa aningaasaateqarfinni assigisaanilu kommuuni pilersitsisuugaangat piginnittuugaangalluunniit, tassani qinikkat siulersuisunut toqqarneqartarnerat allanngormat.
Kommuneqarfik Sermersuumi 2013-imi kommunalbestyrelse ivertinneqarnerminut atatillugu siulersuisunut kommuneqarfimmit pilersinneqarsimasunut, piginneqataaffimminnut piginnittuunerminnullu kommunalbestyrelsemi ilaasortassanik arlaqartunik ilaasortassatut toqqartuisimavoq.
Taamatulli aaqqissuussineq ullutsinnut naleqqukkunnaariartorsimasoq Inuit Ataqatigiit isumaqarput. Taamaattumillu partiip nuannaarutigaa, siulittaasoq nutaaq allamik tunuliaqutaqarmat.
Siulittaasoq piginnaasoq
- Tunumi nakorsaaneq inuttut piginnaasaqarluartoq Hans Christian Florian Sørensen aningaasaateqarfimmi siulersuisuni siulittaasunngornissaa nuannaarutissaavoq. Hans Christian tassaavoq inuk imaannaanngeqisoq, takornariaqarneq ullutsinnut naleqquttoq ilisimasaqarfigilluarpaa ukiunilu kingullerni 25-ini sulinermigut Tunumi innuttaasut akornannut sorlanilluni akuullualersimavoq, Sermersuumi Inuit Ataqatigiinni qinigaatitaanni siulitaasup tullia, Charlotte Ludvigsen tusagassiuutinut nalunaarummi oqarpoq.
Takornariaqarneq ataavartoq
Tunumi kulturi immikkuullarissoq aallaavigalugu ineriartortitsinissap tapersersorneqarnissaa siunertaralugu Aningaasaateqarfik Destination East Greenland (DEG) Kommuneqarfik Sermersuumit ukioq 2009-mi pilersinneqarpoq.
Aningaasaateqarfimmi malittarisassat naapertorlugit siulersuisuni ilaasortat marluk kommunalbestyrelsemit toqqarneqartarput, ilaasortallu allat pingasut Tunumi takornariaqarnermik ingerlatsisunit toqqarneqartarlutik.