Demokratiimi ukiuni sisamani kiffartuussinissaq ullumi aallartissaaq

Inatsisartuni qinigaaffimmi nutaami ulloq siulleq qanoq ingerlassanersoq uani takusinnaavat

Toqqorsivimmit

Inatsisartunut qinikkat qinigaaffiup tullia aallartikkunikku ullumi suliartussapput. Kisianni inissitsiterluni ataatsimiinnermi ullumi aqagulu pisussaq sulinertaqarpallaanngikkallassaaq. Piumasarineqartut naammassiinnagassat inissitsiterneqartussaammata.

Ileqqoq malillugu ataatsimiinneq nalunaaqutaq 9.00 Hans Egedep illuani kaffisoqatigiinnermik aallartissaaq, kingorna ilaasortat ingerlaaqatigiillutik nalunaaqutaq 10.00 Annaassisitta Oqaluffianukassapput. Naalagiaqatigiinnerup kingorna ilaasortat Inatsisartut ataatsimiittarfiannut ingerlaaqatigeeqqissapput, ataatsimiinneq nalunaaqutaq 11.00 aallartissalluni.

Inatsisartunut siulittaasumik suli toqqaasoqanngimmat, ataatsimiinneq utoqqaanersamit aallaqqaammut aqunneqassaaq. Hans Enoksen (PN) siulittaasussatut innersuunneqarmat tamanna sunniuteqarpallaarunnanngilaq.

Ilaasortat Inatsisartuusinnaanersut aalajangerneqassasoq

Oqaluuserisassat siulliit ilagaat Qinigaasinnaanerup misilinneqarnissaanut ataatsimiititsaliap innersuussutaa. Ataatsimiititaliap ataatsimiinneq sioqqullugu pinerluuteqartut nalunaarsorneqartarfiannit paasissutissanik pissarsipput, tamannalu tunuliaqutigalugu qinikkat aamma sinniisut Inatsisartunut ilaasortaatitaasinnaanersut innersuussutigineqartarput. Oqaluuserineqartoq matoqqasumik pisarpoq.

Aatsaat tamatuma kingorna Inatsisartunut siulittaasoq, kiisalu siulittaasuuffiit sinneri qinerneqartarput.

Ullormi oqaluuserisassani kingullertut Naalakkersuisunut ilaasortat toqqarneqassapput.

Aqagu ataatsimiititaliani atorfiit agguaanneqassapput.

Powered by Labrador CMS