Demokraatit: Royal Arctic Line akuersissutaanik arsaarsiuk
Royal Arctic Linep kisermaassisussaanera allanngortinneqartariaqarpoq. Suliassaqarfimmi ammasumik unammilleqatigiinnissaq kissaatigaarput, Demokraatit siulittaasuat oqarpoq, kissaatigalugulu Naalakkersuisut akuersissutip taamaatinneratigut pitsaaqutit ajoqutillu qulaajassagaat.
- Demokraatini tunngaviusumik isumaqarpugut inuiaqatigiinni unammillerneq pitsaasuusoq. Isumaqarpugut tamanna pitsaanerusunik akikinnerusumillu kiffartuussinermik kinguneqassasoq. Taamatut aamma imaatigut assartuussineq isigineqarpoq, Demokraatit siulittaasuat Jens- Frederik Nielsen Inatsisartut ukiaanerani ataatsimiinnissaanni aalajangiiffigisassatut siunnersuummi allappoq, Naalakkersuisullu piumaffigineqarlutik Royal Arctic Linep nunatsinnut nunatsiniillu assartuussinermut akuersissutaata taamaatinnerani pitsaaqutit ajoqutillu misissoqqullugit kiisalu suliassaqarfimmi tassani unammilleqatigiinnissamik ammaassillutik.
Aviisi Sermitsiaq taama allappoq.
Akiliutit akitsuutillu qaffannerat
Jens-Frederik Nielsen naapertorlugu Royal Arctic Linep akigititai innuttaasunut inuussutissarsiortunullu paasiuminaapput, naak umiarsuaatileqatigiit arlaleriarlutik oqartaraluartut assartuussinermi akit 2015-imiilli qaffassimanngitsut, taamaalillutik innuttaasut inuussutissarsiuteqartullu misigalugu Royal Arctic Linep kiffartuussineranik atuineq akisunerungaatsialersimasoq, tamannalu akiliutit, akitsuutit assigisaasalu qaffannerannik peqquteqartoq.
- 2022 tamaat misigaarput ingammik uuliamut nunallu allat aningaasaannut tapiliussaq qaffassimasoq. Maanna aggustip qiteqqunnerani 30,73 procentiuvoq. Imaassinnaavoq allanngorsimassasoq maannakkut siunnersuut Inatsisartunut saqqummiunneqarpat. Assersuutigalugu uuliamut nunallu allat aningaasaannut tapiliussaq 2021-p naalernerani 6,3 procentiuvoq. 2022-mi ukiortaamiit 13,6 procentimut qaffanneqarpoq. Suliassaqarfinni allani nunarsuullu ilaani allani taama annertutigisumik qaffaanerup kingunerissavaa neqeroortumik allamik toqqaasoqarnera. Nunatsinnilli nunatsinnullu imaatigut assartuinermi taamaaliortoqarsinnaanngilaq. Maani Royal Arctic Line atorneqartariaqarpoq. Tamatumalu allanngortinnissaanik Naalakkersuisut pilersaaruteqanngillat, Jens-Frederik Nielsen allappoq, 2021-mit § 37 malillugu apeqqummut akissut eqqarsaatigalugu, tassani allassimalluni umiarsuaatileqatigiinnut isumaqatigiissut taamaatilersaarneqanngitsoq, suliassaqarfimmilu ammasumik unammillertoqarnissaa qanoq akeqassanersoq misissuiffigineqalersaannginnersoq.
Aviisimi Sermitsiami atuarnerusinnaavutit. Aviisi uani pissarsiariuk: