Demokraatit: Piginnittuunermut politikki nutaaq quiasaarutaavoq
Namminersorlutik Oqartussat ingerlatseqatigiiffiutaannut piginnittuunermut politikki nutaaq quiasaarutaasoq Demokraatit siulittaasuata Jens-Frederik Nielsenip oqaatigaa.
Partiit tamarmik – Naleraq kisimi pinnani – piginnittuunermut politikkimik nutaamik isumaqatigiissuteqarnerannit ukioq ataasingajak qaangiuppoq. Partiilli isumaqatigiissummik atsiornerannit ukioq ataasingajak qaangiuttoq Naalakkersuisut piginnittuunermut politikkimik suli ilusilersuisimanngillat, taannami ingerlatseqatigiiffinnut siunissami suna malitassaanersoq ilisimasassaqartitsissaaq.
- Sunniuteqarsinnaajumalluta isumaqatigiissummut peqataaniarluta aalajangernikuuvugut. Namminersorlutik Oqartussat ingerlatseqatigiiffiutaannit iluanaarutit atuisartunut iluaqutaasumik sapinngisamik annikinnerpaanissaat qulakkeerniarlugu kissaatiginikuuarput, Jens-Frederik Nielsen Sermitsiaq.AG-mut oqarpoq.
Attaveqaatinut atuisunut akisuvoq
Assersuutigalugu Tusass A/S-ip ukiut arlallit ingerlaneranni iluanaarutit annertuut mittarfinnut nutaanut aningaasaliissutissatut tunniuttarsimagai tikkuarpaa. 2016-imiilli suliffeqarfik 700 millionit koruunit sinnerlugit akiliuteqarsimavoq.
- Mobiltelefonimik internettimillu atuisut akit qaffasippallaarnerat pissutigalugu aningaasarpassuarnik akiligassaqartarsimapput, tamannalu ingerlaannarnaveersaartariaqartoq, Demokraatit siulittaasuat erseqqissaavoq, politikkikkullu isumaqatigiissummi sinaakkutissat piginnittuunermut politikkimi nutaami malinneqanngilluinnartut isumaqarpoq.
2024-mut aningaasanut inatsimmi ’suliassat allattorsimaffiata’, siornatigut Namminersorlutik Oqartussat ingerlatseqatigiiffiutaannut ataasiakkaanut qanoq annertutigisumik iluanaaruteqarnermut naatsorsuutinik takussutissiisartup peerneqarnera aamma tupigusuutigaa.
- Kinguariarnerujussuuvoq. Ammasuuneq ersarissumillu paasissutissiisarneq pillugit Naalakkersuisut siulittaasuat arlaleriarluni oqaluttarpoq, tamannalu partiit marsimi politikkikkut isumaqatigiissutaanni pingaaruteqarluinnarpoq. Aningaasanut inatsimmi iluanaarutit pillugit paasissutissat peernerisigut ilisimanngilarput ingerlatseqatigiiffinnut ataasiakkaanut piumasaqaatit qanoq ikkumaarnersut. Tamanna ammasuunerup ersarissumillu paasissutissiinerup akerlerluinnaraat, pissutsit tamakku siunissami matoqqasumik isumaqatigiinniutigineqarsinnaalerpata, Jens-Frederik Nielsen erseqqissaavoq.
Ataatsimiinnissaq qilanaarigaa
Piginnittuunermut politikki ukiumut ataasiarluni nalilersorneqartariaqartoq isumaqatigiissutaammat, isumaqatigiinniartut qanittukkut ataatsimiinnissamut qaaqqusinissaat qilanaaraa.
- Maanna ukioq ataaseq qaangiutilereerpoq, taamaalillutalu suli angusaqarsimannginnerput nalilersinnaavarput. Tamanna isornartorsiornarpoq, Demokraatit siulittaasuat oqarpoq.
2021-mi apriilimi Inatsisartunut qinersisoqarmat piginnittuunermut politikki nutaaq Naalakkersuisut Siumukkormiut piareeqqavaat. Qinersinerup kingorna IA naalakkersuisunngortitsimmat, siunnersuut Múte B. Egedemit atorunnaarsinneqarpoq, nutaamillu suliniuteqalerpoq, maanna ukiut pingasungajaat qaangiuttut suli naammassineqarsimanngitsumik.