Demokraatit: Peqqinnisaqarfimmik atuinermut akiliuteqartitsisoqartalerli
Demokratit isumaqarput, peqqinnissaqarfimmik atuinerit ilaannut akiliuteqartitsisoqartariaqartoq.
Peqqinnissaqarfimmut amerlanerujartuinnartunik aningaasaliissuteqartarneq iluaqutaanngilaq, Inatsisartuni ammaanersiorluni oqallinnermi, Demokraatit siulittaasorigallagaat Nivi Olsen isummaminik annissivoq. Taamaammat Demokraatit siunnersuutigaat, Peqqinnissa pillug Ataatsimiititaliarsuarmik pilersitsisoqassasoq, ”suliaqarfiit sorliit iluaqutissartalimmik pingaarnersiorneqarnissaannut suliaqarfinnilu sorlerni iluaqutissartalimmik atuisut akiliuteqartarnerannik” kaammattuisussamik.
- Assersuutigalugu Danmarkimi nakorsaatinut kigutinillu isumaginninnermut atuisutut tamakkiinngikkaluartumik akiliuteqartoqartarpoq, Nivi Olsen oqaaseqarnermini erseqqissaavoq.
Nakorsat peqqissaasullu allaffissornermi suliassanut sanilliullugu napparsimasunut attaveqartarnertik salliutinnerusariaqaraat, Nivi Olsen erseqqissaavoq.
Oqimaaqatigiissikkuminaattoq
- Oqimaaqatigiissikkuminaappoq, Peqqinnissaqarfimmulli aningaasaleeqqeqattaaginnarnissarput iluaqutaanavianngilaq. Aningaasat eqqortumik aamma atorneqarnissaat ukkatarinerusariaqarluinnarparput, taanna oqarpoq.
Demokraatit isumaqarput, peqqinnissakkut pitsaanerpaamik sullinneqarnissatsinnut piareersimasoqarnissaa qulakkeertariaqariaqartoq.
- Ullumikkut ajoraluartumik taamaanngilaq, peruluttummi nalaffissaat annertuumik amigaatigivagut. Tamatumalu ajoraluartumik kinguneraa qanigisaasut napparsimasortamik napparsimmavimmiinnerannik nuanninngitsumik ataqqinninngitsumillu misigisaqartarnerat. Tamanna pitsaanerulersittariaqarparput , Nivi Olsen erseqqissaavoq, Peqqinnissaq pillugu Ataatsimiititaliarsuarmik pilersitsinissamut aningaasanut inatsisissaq pillugu ukiaq manna isumaqatigiinniarnernut atatillugu aningaasassarsinissamut neriuuteqartoq.