Demokraatit: Namminiilivinnissaq anguniagaavoq
Namminiilivinnissaq nunatsinnilu inuuniarnerup ajornannginnerullunilu akikinnerunissaa Demokraatit anguniarpaat. Partiip qineqqusaarnermi anguniagai tallimanngornermi saqqummiunneqarput.
Demokraatit Inatsisartunut qinersinissamut anguniakkaminik saqqummiigami aningaasaqarnikkut isumatusaarnissaq tunngavigalugu nassuiaapput. Coronap tunillaassuunnerata kinguneranik aningaasaqarneq ukiuni tulliuttuni mianersuunneqartariaqarpoq, ajalusuussanngippat, oqaatiginiarneqarpoq.
Taamaattoq Demokraatit anguniakkanik arlalinnik, aningaasartuutaasussanik, taamaattorli siunissami ilaatigut sipaaruteqarfiusinnaasunik saqqummiipput.
- Ilinniartitaaneq pingaaruteqarpoq inuk nammineerluni inuunerminnik ingerlatsisinnaaneranut aqqutissiussisuummat. Isumaqarpugut ilaqutariinnut, meeqqat atuarfiannut isinnginnermi sulianut aamma meeqqat atuarfiini arlalinnik iluarsisassaqarluta. Tassuunga aningaasaliisariaqarpugut aaqqiissuteqarlutalu, amerlanerusut pitsaasumik ilinniagaqalernissaat anguniarlugu, Nivi Olsen oqarpoq.
Demokraatit anguniakkatut allattorsimasaat amerlapput.
Anguniakkat ilamininngui aajuku:
- Nunanut allanut politikki ingerlanneqarluartoq nukittoorlu
- Pisortat allaffissornikkut aningaasartuutaat ikilisinneqassapput
- Meeqqerivinni atuarfinnilu sulisut amerlanerit
- Ilulissani GUX
- Suliffeqarfiit akileraarutaat 20 peocentimik apparneqassaaq
- Inuussutissarsiortunut toqqaannartumik tapiissutinik killiliussamik atuutsitsineq aamma toqqaannanngitsumik tapiissutinik piiaaneq
- Takornariaqarneq, aalisarneq aamma aatsitassarsiorneq ineriartortinneqassapput
- Pisassiissutit niuerutigineqarsinnaasut aamma aalisarnermut inatsit inuiaqatigiinnut aalisartunullu iluanaarutaasussaq akuersissutigineqarnissaa
- Akileraarut appartinneqassaaq imaluunniit sulinermut ilanngaat qaffanneqassaaq
- Naatsorsuutigaarput mittarfinnut aningaasaliinerit siunissami aningaasanik isertitaqarnermik kinguneqarumaartut. Aamma naatsorsuutigaarput inuiaqatigiit pisisinnaassusaat annertunerulertikkutsigu aningaasat kaaviiaarnerulersissallugit. Suli allaffissornikkut ukkatarivarput eqaaallisaanissaq, akikinnerulernissaa. Suli akisussaassusilimmik politikkeqarnerput ingerlateqqissuarput, Jens-Frederik Nielsen anguniakkat qanoq aningaasalersorneqassanersut pillugit toqqaannartumik aperineqarami taama akivoq.
Anguniakkat suli amerlanerit
Nivi Olsenip anguniakkatut pingaarnertut saqqummiussai tassaapput ilaqutariinnut siunnersortit.
- Najukkani tamani tarnip pissusaanik ilisimasalimmik atorfinitsitsisinnaanngilagut, tamanna nassuerutigisariaqarparput. Kisiannili najukkani nukissalinnik peqarpugut, isumaqarpugullu najukkani tamani ilaqutariinnik siunnersortinik, ilaqutariinnut aqqutissiuussisinnaasunik atorfinitsitsisinnaalluta. Najukkat tamarmik ilaqutariinnut siunnersorteqalernissaat sulissutigissuarput, oqarpoq nassuiaallunilu ilaqutariit atukkamikkut tarnimikkullu ilungersuutaannik ilaqutariinnermut siunnersortit suliaqartassasut.
Anguniakkat oqimaannerusut ilaanniipput oqartussaaffiit danskit tigummisaat 32-iusut nunatsinnut angerlaanniarnissaat. Steen Lynge isumaqarpoq nunatsinnut oqartussaaffinnik angerlaassuilernissamut sapiissuseqalertariaqartugut.
- Oqartussaaffiit qanoq tulleriinnilersorlugit tigunissaannut pilersaarusiorniarpugut, qanorlu angerlaassorneqarnissaannut pilersaarusiorluta. Assersuutigigutsigu inuussutissalerinermut oqartussaaffiup angerlaannissaannut aningaasartuutit 35 milliuunit koruunit missaat piareersimatittariaqarpagut, taamaattorli inuussutissalerinermut oqartussaaffik 100 milliuunit koruuninik isertitsissutigisinnaallugu. Oqartussaaffinnut aningaasaliisariaqarpugut, nammineernerulernitsinni aamma isertitassaqarmat, nassuiaavoq.