Skip to main content

Demokraatit: Naalakkersuisoqarfik nutaaq sipaaruteqarnermik kinguneqassaaq

Aningaasaqarnikkut mianersorneq aallaavigalugu Demokraatit Inatsisartunut qinigassanngortipput. Naalakkersuisoqarfimmik nutaamik pilersitsinikkut pisortat aningaasartuutaat ikilisinneqarsinnaasut siunnersuutigaat.

Pisortat ingerlatsinerannut aningaasartuutit ikilisinneqarnissaanik anguniagaqarlutik Demokraatit Inatsisartunut qinigassanngortillutik sassarput.

Pitsaaliuinermut timersornermullu suliaqarfiit ataatsimoortilerlugit naalakkersuisoqarfiliornikkut, pisortat aningaasartuutaat ilaatigut appartinneqarsinnaasut siunnersuutigaat. Partiip siulittaasuata nassuiaatigaa naalakkersuisoqarfiit arlallit pitsaaliuinermik suliaqartartut, sulialli ataatsimoortileraanni iluaqutissartaqarpoq.

- Pitsaaliuinermik suliaqarneq naalakkersuisoqarfimmut ataatsimut katersorsinnaagutsigit, sulineq eqaallisarneqarsinnaavoq. Inuiaqatigiinnut aningaasaliineruvoq piffissaq ungasinnerusoq eqqarsaatigalugu peqqinnerulernermik aningaasanillu atuinnginnerulernermik kinguneqartussaq, Jens-Frederik Nielsen Sermitsiaq.AG-mut nassuiaavoq.

- Inooriaatsimit aallaaveqarnermit nappaataalersimasunut peqqinnissaqarfiup aningaasartuutai, pitsaaliuinermik ukkassinerulernitsinni appartissinnaavagut, oqarpoq.

33 milliuunit koruunit tungaannut 

Paasissutissanik ujaasinerup takutippaa Namminersorlutik Oqartussat naalakkersuisoqarfimmi ataatsimi, sulisoqarnermut, atortunut sullissinernullu allanut aningaasartuutai ukiumut 33 milliuunit koruunit tungaannoorsinnaasut.

Namminersorlutik Oqartussat sulisoqarnermut 2016-2018-imi aningaasartuutai pillugit misissuinerup takutippaa aalisarnermut piniarnermullu naalakkersuisoqarfimmut sulisoqarnermut akissarsianut, atortunut sullissinernullu allanut 2018-imi aningaasartuutai 33,1 milliuunit koruuniusimasut. Naalakkersuisoqarfik ukiumi tassani aningaasartuutikinnerpaasimasoq, tassa aatsitassarsiornermut naalakkersuisoqarfik, 15,1 milliuunit koruuninik atuisimavoq.

Naalakkersuisoqarfilli nutaaq inuiaqatigiinnut siunissamut aningaasaliinerussaaq, Jens-Frederik Nielsen oqarpoq.

- Suliaq iluatsissappat piffissaq sivisunerusoq qiviarlugu aningaasaliissut pitsaasuusoq. Isumaginninnerup peqqinnissaqarfiullu iluani aningaasartuutigut maanna annertupput, upperilluinnarparput taakkua annikinnerulertissinnaallugit timersorneq pinaveersaartitsinerlu ukkatarinerugutsigit, oqarpoq.

Aningaasat amigaatigineqartussat ikinnerulersinneqassapput

Aningaasaqarnermut siunnersuisoqatigiit nalunaarusiani erseqqissartareerpaat pisortat aningaasartuutaat qaffakkaluttuinnartut, isertitaniillut 1 milliardit koruuninik amerlanerusunik 2035-imi pisortat aningaasartuuteqarnerulersimassasut. Ukiumut 1 milliardit koruuninik sippuilluni atuisariaqalernissaq pinngitsoortinniarlugu qitiusumik aqutsiveqarfinni aningaasartuutit qanoq annikillisinnissaannut Demokraatit qulaajaajumapput, taamatullu eqaallisaajumallutik. Demokraatit siullertut siunnersuutigaat pisortat aningaasartuutaat ukiumut 1 procentimik ikilisinneqartalissasut.

- Pisortat ingerlatsinerannut aningaasartuutit ikilisittariaqarput. Tamannalu nassuerutigisariaqarparput iluatsissimanngitsoq. Naalakkersuisoqarfiit tamakkerlutik aningaasartuutaat pillugit qulaajaarusuppugut, sutigut sipaaruteqartoqarsinnaanersoq paaserusullugu. Sulinermi eqaallisaanissaq pisariaqarluinnarpoq, Jens-Frederik Nielsen oqarpoq erseqqissarlugulu qitiusumik ingerlatsinermut aningaasartuutit amerlavallaartut atorneqartut, innuttaqqortussuseq qiviassagaanni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER