Demokraatit: Kangerlussuaq aamma Narsarsuaq heliportiussapput

Siunissami mittarfiit qanoq isikkoqartariaqarneri pilluguit, Demokraatit siulittaasuat Niels Thomsen, erseqqissumik oqariartuuteqarpoq. Taanna naalakkersuinermik suliallit aalajangiinissaannik kajumissaaruteqarpoq.

Demokraatit aalajangiisuussagaluarunik, mittarfiliortiternermut atatillugu periarfissatut ilusiligaq aallaaviusoq 1 toqqarneqartariaqaraluarpoq, Kangerlussuup aamma Narsarsuup heliportinngortinneqarnissaannik tamanna isumaqarpoq, aamma Nuummi Ilulissanilu atlantiku qulaallugu timmisartunut mittarfiliortoqarluni, kiisalu Qaqortumi nunap immikkoortuani mittarfiliortoqarluni.

Mittarfiit pillugit naalakkersuinermik suliaqartut aalajangiinissaannik innuttaasut pisariaqartitsisut, Demokraatit siulitaasuat Niels Thomsen isumaqarpoq.

Akissutisinissaq piffissanngortoq

- Mittarfiliortiternissat ukiorpassuarni oqallisigereerpagut. Piffissanngorpoq innuttaasut uangut politikerit qanoq isumaqarnerput pillugu ersarissumik oqaluttuunneqarnissaat. Piffissami sivisuallaami politikerit amerlavallaat mittarfiit pillugit isumaqarnissartik qunugisimavaat, paarlattuanillu imaqanngitsut utoqqatsissutinnaarisimallugit soorlu naatsorsuinerit allallu utaqqinerarlugit, Niels Thomsen tusagassiuutinut nalunaarummi allappoq.

Demokraatini aallaqqaataaniilli Ilulissani Nuummilu atlantiku qulaallugu timmisartorsuarnut mittarfiliornissat taamatullu Qaqortumi nunap immikkoortuani mittarfiliornissaq illersorsimallugit, taassuma naqissuserpaa.

- Misissuinerit naatsorsuinerillu pereersut isummagut allanngortinnikuungilaat. Misissuinerimmi ersarissumik takutippaat Narsarsuup Kangerlussuullu qulimiguulinnut mittarfinngortinnissaat iluaqutissartaqarluartussaasoq. Taamaattumik isumaqarpugut taamaaliortoqartariaqartoq, Demokraatit siulittaasuat oqarpoq.

Nuannarineerussinnaasut

Niels Thomsenip taamatut oqariartuuteqarnini namminerminut partiimullu kinguneqarsinnaasoq erseqqissaatigaa.

- Nalunngilluinnarpara taamatut oqarama uanga parteeralu nunatsinni sumiiffinni aalajangersimasuni nuannarineqarnavianngitsugut. Kisianni uangut politikeritut qinigaavugut aalajangiisussanngorluta, tamannalu qunuginngisaannassavarput, taanna allappoq.

Angallannikkut tamakkiisumik allannguinissaq Nunarput tamaat isigalugu aaqqiissut eqqortuusoq, partii isumaqarpoq. Taakku tunngavilersuutigaat, innuttaasorpassuit angalasarnerisa sivikillinissaat aamma amerlanerit akikinnerusumik angalasinnaanngorumaarnerat neriuutigalugu.

Partiinit annerit nalunaaruteqarnissaa piumasarigaa

- Taava maannakkut utaqqiinnartussanngorparput IA-p Siumullu aamma taama ersaritsigisumik nalunaaruteqarnissaat. Politikerit nunatsinni partiit annersaanneersut manna tikillugu erfattunik isummersorput tamatulu takutiinnarpaa aqutsineq amingartoq sammivissarlu ersarluttuusoq, Niels Thomsen oqarpoq.

- Takulaariarsiuk; qanorsuarluunniit isummersortoqaqili akornassinni. Innuttaasulli sinnerlugit uanga paaserusuppara partiitut mittarfiliortiternissat qanorpiaq isumaqarfiginerisi. Misissuinerit naatsorsuinerillu naammattorsuit suliarineqareerput - ilissilu politikeritut suliassarsi tullinnguuppoq; tassalu aalajangiinissarsi, taanna oqarpoq.

Powered by Labrador CMS