Demokraatit: Imigassamut inatsit nutaaq kiffaanngissutsimut ajugaaneruvoq

Imigassamut inatsisip qasukkarnera pillugu isornartorsiuisut Malene Vahl Rasmussenip (D) illuatungilerpai. Meeqqat Ikiortigit imigassamut inatsisip sivikippallaamik atuussimaneranut KNR-imut oqaaseqaataa ilanngullugu oqaaseqarfigaa.

- IA siuttoralugu Naalakkersuisut imigassaq pillugu sukaterimmata, Demokraatini sukaterinerit akerlerisimavagut, qinersereernerullu kingorna sunniuteqarsinnaalissagaluarutta sukaterinerit tamaasa atorunnaarsinneqarumaartut neriorsuutigalugu. Neriorsuuterput eqqortipparput, tamannalu perruualaarutigaarput, tusagassiutinut nalunaaruteqarluni allappoq.

Demokraatit isumaqarput imigassamut inatsit allanngortinneqanngikkallarmat inuiaqatigiinnut inerteqqusiornerusoq, innuttaasullu kiffaanngissusaannut kalluaasoq. Inatsisip allanngortinneqarnerani kiffaanngissuseqarneq ajugaatinneqarpoq, allappoq.

Imigassaq suli ajornartorsiutaavoq

Imigassarli inuiaqatigiinni suli ajornartorsiutaangaatsiartoq aamma nassuerutigaa.

Taassuma erseqqissarpaa Inatsisartut upernaakkut ataatsimiinnerminni katsorsaasarnermut inatsisissatut siunnersuut Inatsisartut suliarisimagaat, inatsisissatullu siunnersuutip namminersortuullutik katsorsaasartut pitsaanerusunik periarfissaqartilissagai.

- Inatsit siulleq atuutsillugu namminersortuullutik katsorsaasartut imigassamik ajornartorsiuteqartunik katsorsaanissaminnut periarfissaqarsimanngillat. Katsorsarnissamullu periarfissat Allorfimmut taamaallaat atasimallutik, tassa Naalakkersuisut ataanniillutik. Katsorsaasarnermut inatsit nutaaq atorlugu katsorsaasartut namminersortut katsorsaanissaminnut aamma periarfissaqalissapput, Malene Vahl Rasmussen Sermitsiaq.AG-mut nassuiaavoq.

Nukiit tamarmik atorneqartariaqarput

Taanna isumaqarpoq inuiaqatigiinni piginnaanillit amerlanerit atorluarneqarsinnaasimanngitsut, politikkikkut killilersuisoqarallartillugu.

Taamaammat tikkuarpaa Naalakkersuisut katsorsaasartunut namminersortunut Naalakkersuisut tatiginninnerusariaqartut, namminersortut imigassamik ajornartorsiuteqartunik katsorsaatinneqartalernissaat anguniarlugu, katsorsaanissamullu periarfissat nakkutigeqqissaarneqartut kisiisa atornagit.

- Upperaarput kikkulluunniit akisussaaqataarusullutik aalajangertut periarfissinneqartassasut, taamaammat Kalaallit Nunaanni katsorsartinnissamut neqeroorutit katsorsaasullu akuerisat ataqqineqartulluunniit kikkunnit tamanit atorneqarsinnaalernissaat Naalakkersuisunut piumasaraarput.