Demokraatit: APF politiinut unnerluutigineqarnersoq paasisariaqarparput

Demokraatineersup Jens-Frederik Nielsenip maanna isornartorsiorpaa Aalisarnermut Naalakkersuisoqarfiup ammasumik oqaluttuarinngimmagu umiarsuaatileqatigiiffik Arctic Prime Fisheries politiinut unnerluutigineqarsimanersoq.

Arctic Prime Fisheriesip politiinut unnerluutigineqarnissaanik, sivisuumik politikkikkut qassiiiliuutaasimasumik, Aalisarnermut Piniarnermullu Naalakkersuisoqarfiup nalorninartorsiortitsinera Demokraatit siulittaasuata Jens-Frederik Nielsenip isornartorsiorpaa.

Nalornissutigineqartorujussuuvoq aalisarnermik ingerlatseqatigiiffik Arctic Prime Fisheries, APF, siulersuisunut siulittaasoq Jørgen Wæver Johansen siuttoralugu Aalisarnermut Piniarnermullu Naalakkersuisoqarfimmit politiinut unnerluutigineqarsimanersoq.

Aviisi Sermitsiaq taama allappoq.

Maannali Demokraatit siulittaasuat Jens-Frederik Nielsen isumaqarpoq naalakkersuisoqarfiup suliassaq, sivisuumik politikkikkut qassiiliuutaasimasoq, nalorninartoqartilersimagaa.

- Naalakkersuisoqarfik siusinnerusukkut ilimasaarigami aalisarnermut inatsisip unioqqutinneqarsimanera pissutigalugu politiinut nalunaarutiginnittoqassasoq, taava taamaaliortoqassaaq. A-mik oqasimagaanni aamma b-mik oqartariaqarpoq. Taarsiullugu naalakkersuisoqarfik suliassaq pillugu nalornisitsilerpoq, siullermik nalunaaruteqariarluni oqarsimanermisut iliuuseqannginnami. Tamanna ingerlatsinerlunneruvoq, Demokraatit siulittaasuaat Jens-Frederik Nielsen oqarpoq.

Naalakkersuisoqarfiup pisortaa oqassaanngitsoq Jørgen Isak Olsen, Kujataani ingerlatsiviit annersaat, Arctic Prime Fisheries, politiinut unnerluutigineqarsimanersoq pillugu nipangersimavoq.

- Suliassaq taanna pillugu oqaaseqaqqissanngilanga. Tamanut saqqummiunnianngilara kina politiinut unnerluutigisimaneripput, naalakkersuisoqarfiup pisortaa oqarpoq.

Aviisimi Sermitsiami atuarnerusinnaavutit:

Powered by Labrador CMS