Demokraatit: Aallarnisaasunut nutaanut tapiissutit sipaaqinasigit
Jens Frederik Nielsenip (D) Naalakkersuisut isornartorsiorpai aningaasanut inatsisissatut siunnersuummi aallarnisaasunut tapiissutini 1 millioner koruunit sinnerlugit sipaaruteqarniartutut.
Inatsisartunut ilaasortamut Demokraatillu siulittaasuannut, Jens Frederik Nielsenimut, aningaasanut inatsit nunap siunissaanut takorluukkatut isumaqarpoq, tassanilu allassimasut tassaasussaallutik Naalakkersuisut siunissami sulissutiginiagaat. Aviisi Sermitsiaq allappoq.
- Kalaallit Nunaata namminiilivinnissaanut matuersaat tassungalu aqqut aningaasanut inatsimmiippoq. Tamanna eqqarsaatigalugu aningaasanut inatsisissaq pillugu isumaqatigiinniarnernut takkutissaanga. Taamaappoq nunarput aningaasaqarnikkut nukittunerulersinniassagatsigu, nunarput nammineerluni aningaasarsiornissamut pikkorinnerulersinnaaniassammat. Tamanna uummatinnik tamakkiisumik sorsuutigaara. Aningaasanullu inatsisissatut siunnersuut nunatta aningaasaqarnikkut nukittunerulissutigisassaanik allanillu isumalluuteqarunnaarnissaanut tunngasunik imaqanngippat, aningaasanut inatsisissatut siunnersuummut tapersersuinissarput naatsorsuutigineqassanngilaq, Jens Frederik Nielsen Sermitsiamut oqarpoq, Naalakkersuisullu inuussutissarsiutinik siuarsaanissamik suliniutinut tapiissutini 1,3 millioner koruuninik sipaaruteqarniarnerat innersuussutigalugu.
Allaaserisaq tamaat uani Sermitsiami pisiarisinnaasanni atuaruk: