Demokraatit Trumpip oqaaseqarnera pillugu: Piviusorsiunngitsoq aamma ingasattoq

USA-p præsidentiata Kalaallit Nuntaata pisiarinissaa soqutigaa.

Tusarfiit kinaassutsiminnik isertuussisut suliamik ilisimannittut arlallit, amerikamiut aviisiannut Wall Street Journalimut taama oqarput.

Kalaallit Nunaata pisuussutai aamma nunat akornanni politikkikkut pingaassusaa pillugit oqallinnernut, præsidenti arlaleriarluni oqalliseqataasarsimavoq.

Oqaaseqaat ingasattoq

Præsident Donald Trumpip oqaaseqaataanut Demokraatit akuersaanngilluinnarput.

- Oqaaseqaat quianarlunilu piviusorsiunngitsuuvoq. Kisianni aamma oqaaseqaataavoq ataqqinninnginnermik takutitsisoq, Demokraatit siulittaasorigallagaat, Nivi Olsen, Sermitsiaq.AG-mut taama oqarpoq.

Kalaallit Nunaat ersarissunik aalajangersimasunillu illersornissamut politikkimut aamma nunanut allanut tunngasunut politikkimi killeqartariaqartoq, partii Naalakkersuisunut tapertaasoq oqariartuuteqarpoq.

- USA-p præsidentia Kalaallit Nunaannut soqutuginnippoq, nunap pingaaruteqarnera pissutigalugu. Nunat inissisimanerat naapertorlugu politikkikkut nuna eqqortumik inissisimavoq, nunat pissaanilissuit marluk USA-p aamma Ruslandip akornanni inissisimalluni. Nunat pissaanilissuit marluk pissaaneqarniunnerisa akornannut pinnginnissarput mianersuutissavarput, Nivi Olsen nangippoq.

Nunaarannguaq – oqaluuserineqarneq annertooq

Trumpip pisiniarnermut allattorsimaffiata pillugu nutaarsiassaq nunarsuaq tamakkerlugu nunatsinni nalunaaqutaq malillugu unnuakkut ingerlaarpoq. Amerikamiut tusagassiorfii naapertorlugit Trumpip soqutiginninnera ukiuni marlunni kingullerni arlaleriarluni soqutiginnittarpoq. Tamannalu pisinnaanersoq siunnersortini aperisarsimavai.

Nunap soorunami tuniniagaannginnera Demokraatit siulittaasorigallagaata naqissuserpaa. Kisianni oqaatigaa, Kalaallit Nunaata soqutiginaateqarnera oqaluuserineqarnerata takutikkaa.

- Nunarsuup sinneranut oqaluuserineqarneq pitsaasuulluinnarpoq. Nunarsuup sinnerata nunarput maanna isiginialerpaat, taamaattumillu nunarput mianersuulluarlugu ineriartortittariaqarparput, taanna oqarpoq.