Demokraatit siunnersuisoqatigiit politikkimik tunngaveqarnerarpaat

Demokraatit imigassanik nioqquteqarnerup ammasarfii sivitsorneqarnissaannut tamatuminnga ilisimatusarnermik tunngaveqartumik Imigassaq Ikiaroornartullu pillugit Siunnersuisoqatigiit aarlerisaaripput.

Randi Vestergaard Evaldsenip aamma Justus Hansenip (D) tamanna tunngavigalugu siunnersuisoqatigiit politikkikkut tunngaveqarnerarpaat.

Isornartorsiorneq peqqarniitsoq
Peqqissutsimut naalakkersuisoq, Agathe Fontain (IA), isornartorsiornermut akissuteqarpoq.

- Isumaqarpunga isornartorsiuineq peqqarniitsuullunilu tunngavissaqanngitsoq. Imigassaq Ikiaroornartullu pillugit Siunnersuisoqatigiit politikkimut kalluunnaveersaartuupput, kisianni suliamut tunngatillugu kalluunnaveersaarsinnaanatillu kalluunnaveersaanngisaannassapput, taanna tusagassiuutinut nalunaarummi oqarpoq.

Randi Vestergaard Evaldsen aamma Justus Hansen isornartorsiornerminni killissamik qaangiisut taanna isumaqarpoq.

- Taamaattumik imigassanik aalakoornartortalinnik tuniniaasarnerup sivitsorneqarnissaanik siunnersuutaat siunnersuisoqatigiinnit mianersoqqussutigineqarnera pissutigalugu Imigassaq Ikiaroornartullu pillugit Siunnersuisoqatigiit Naalakkersuisut soqutigisaannik aallussinerarlugit uparuaagamik killissartik qaangerpaat, taanna oqarpoq.

Atuineq annikillisinniaraat
Siunnersuisoqatigiit tamatumunnga ilisimatusarneq tunngavigalugu Naalakkersuisunut siunnersuisartut, Agathe Fontainip erseqqissaatigaa.

- Misissueqqissaarnerillu tunngavigerpiarlugit Demokraatit ammasarfiit sivitsorneqarnissaannik siunnersuutaat siunnersuisoqatigiit mianersoqqussutigigaat. Tassami misissueqqissaarnermit ersersinneqarpoq imigassamik atuinerup annikillisinnissaata imigassamillu atornerluinerup pitsaaliornissaata anguniarneranni ammasarfinnut tunngatillugu killilersuineq sunniuteqarluartartoq, Agathe Fontain oqarpoq.