tikkuartuisut
Demokraatit siulersuisuunerini isumaqatigiinnginneq
Demokraatit Inuusuttaani siuttup Naalakkersuisut naalakkersuisooqatigiinnermut tunngaviusup akerlinganik iliornerarpai
Siullermik Atassummi politikereq nuimasoq Steen Lynge, aalisarnermut naalakkersuisup Pinngortaleriffik siunnersuutaa qarsutiinnarlugu aalajangiinera isornartorsiorpaa.
Atuaruk: Saarullinnik pissaasiineq akisussaasuseqanngitsoq Atassut isumaqarpoq
Maannali aamma naalakkersuisooqataasut aappaannit aamma isornartorsiusoqarpoq.
- Aalisarneq nunatsinni inuussutissarsiutini pingaarnersaavoq, taamaammallu pisassiissutit aqulluarneqarnissaat agguaanneqarnerilu pingaartorujussuuvoq. Karl-Kristian Krusep arlaleriarluni maanna takutereerpaa aqutsilluarani aammalu naalakkersuisooqatigiinnermut isumaqatigiissut malissinnaasimanngilaa.
Demokraatit Inuusuttaasa siuttuannit siulittaasut tullia Henrik Thomsen aamma siulittaasoq Demokraatinilu siulersuisuni ilaasortaq, Rasmus Dalsgaard Andersen ataatsimut oqaaseqaataat taama aallartippoq.
Saarullinnut pisassiissut siunnersuutigineqartumit marloriaat
Taakkua marluk Steen Lyngep isummernerata assinganik isummerput, tassa aalisarnermut naalakkersuisup Karl-Kristian Krusep nunatta saarulleqarnera pilliutigigaa saarullinnut pissassiissut 25.000 tonsimut inissillugu - kisitsit biologit siunnersuutigisaannit marloriaat sinnerlugu annerstunerusoq (12.000 ton, red.)
Naalakkersuisooqatigiinnermi immikkoortumi aalisarnermut tunngasumi allaqqavoq:
'Aalisarneq nunap annerpaatut pingaarnerpaatullu inuusutissarsiutigaa isertitsissutiginerpaallugulu. Naalakkersuisooqatigiit isumaqatigiissutigaat, pingaaruteqartoq piujuartitsinissamik tamanna tunngaveqassasoq. Biologit aamma aalisartut ilisimasat pisassanik siunnersuuteqarnermi naligiimmik isiginiarneqassapput.'
Naalakkersuisooqatigiinnermut tunngaviusumut naapertunngitsoq
Taakku Demokraatit marluk isumaqarput, naalakkersuisoq Karl-Kristian Kruse Kalaallit Nunaata siunissaanut ulorianaatilimmik aamma naalakkersuisooqatigiinnermut politikkikkut Siumut, Demokratit Atassutillu isumaqatigiissutaannut naapertuutinngitsumik iliortoq.
- Kalaallit Nunaanni inuusuttut nunarput akisussaaffigilissagunikku ingerlateqqissinnaanngorlugulu, taava maanna aalisarneq pisoq, naalakkersuisooqatigiinnermut isumaqatigiissutaasutut piujunnartussasut ingerlasariaqarpoq, Rasmus Dalsgaard Andersen aamma Henrik Thomsen ataatsimut allakkaminni taama allapput.