Demokraatit partiini anginersaanngornissaa Niels Thomsenimit anguniarneqarpoq

Randi Vestergaard Evaldsen Demokraatini siulittaasuujunnaarpoq.

Demokraatit Ilulissani nuna tamakkerlugu nalinginnaasumik ataatsimeersuassapput ulluni ukunani 16.-17. juuni tassanilu siulittaasussamik nutaamik qinersisoqassaaq, Randi Vestergaard Evaldsen ulloq 27. maaj siulersuisuunerit ataatsimiimmata nalunaarmat siulittaasumut qinigassanngorteqqinniarani. Siulersuisuunerit isumaqatigiillutik siulittaasussatut inassutigaat Niels Thomsen.

Randi Vestergaard Evaldsen 2016-p aallartisimalerneranili Demokraatini siulittaasunngorpoq, Anda Uldum aaliangermat Danmarkimut nuunniarluni. Partiimut piffissaq siuariartorfiusimavoq, 2017-mi kommunimut qinersinermi minnerunngitsumillu qanittukkut Inatsisartunut qinersisoqarmat.

- Nuannaarutigilluinnarpakka tulluusimaarutigalugillu Demokraatinut siuttuuninni angusimasagut aammalu partiitta siuariaqqinnissaa suleqataaffigeqqinnissaanut qilanaarpunga, kisianni siulittaasutuunngitsoq, Randi Vestergaard Evaldsen oqarpoq.

Randip neriuutigaa partiimi siuttunut ilaaginnarsinnaassalluni. Aamma siunertaraa nuna tamakkerlugu ataatsimeersuarnermi siulittaasumut tullinngorniarnissani.

- Amerlasuut eqqumiigissagunarpaat aaliangernera, angusagut kusanartorsuit eqqarsaatigissagaanni. Kisianni uannut partii pingaarnerpaajuaannarpoq nammineerlungalu nalilersimavara parteerput suli anginerulersinnaasoq Niels Thomsen siulittaasoralugu. Isumaqarpunga neriullungalu Niels Thomsenip Demokraatit ima inissisimalersissinnaassagai allaat IA Siumullu nunami maani partiit annersaattut unammillersinnaalerlugit. Sukkulluunniit tunuani illersortuassavara sulineranilu tapersersorlugu, Randi Vestergaard Evaldsen oqarpoq.

Demokraatinut siulittaasunngortussanngorunartoq Niels Thomsen suliariligassaminut maniguuppoq.

- Soorunami qinigaaqqaassaanga aamma Ataatsimeersuarnerup tungaanut allanik sassartoqariaannaavoq. Taamatulli oqareerlunga piareersimavunga partiip tunuliaqutaasa qinersisartuisalu tatiginninnermik takutitsinerat ilungersorlunga malersorumallugu. Isumaqarpunga Demokraatit piffissami matumani kusanartumik ineriartortut aamma ilungersuutigissuara siuariartornerup ingerlaannarnissaa. Arlaannaataluunniit qularissanngilaa, anguniaratsigu nunami maani partiini annersanngornissarput politikkimut ingerlanneqartumut annerpaamik sunniuteqarumalluta aamma inuiaqatigiit kusanartumik ineriartortikkumallugit,
Niels Thomsen oqarpoq.

- Nuna tamakkerlugu ataatsimeersuarnissaut qilanaarpunga aamma qilanaarpunga uagut Demokraatit partiip siunissami ingerlariaqqinnissaanut siuttussanik qinersinissatsinnut.