KL

DK

Demokraatit mittarfissap 1500 meteriunissaa piumasaraat

Demokraatit isumaqarput, uranimut atatillugu politikkip allanngortinneqarnrata uulisiornerullu unitsinneqarnerata saniatigut Qaqortumi mittarfissap naannerulersinniarneqarnera nunap ineriartortinneqarnissaanut aporfiit ilagissagaat.

Merete Lindstrøm

Demokraatiniit oqariartuut ersarilluinnarpoq. Nunap immikkoortua ineriartortinniarlugu Qaqortumi mittarfissap 1500 meteriunissaanik aalajangiussisimaneq attatiinnartariarpoq.

Naalakkersuisoq partiilu Qaqortumi mittarfissap takissusissaa pillugu​​​​​​

Naalakkersuisup Naaja Nathanielsenip (IA) oqaatigisimavaa, 1199 meteri pilersaarutaasimasumut 1500 meteriusumut taarsiunneqarluarsinnaasoq. Taanna isumaqarami, 1199 meterimik sanaartornissaq akikinnerussasoq aamma allatuulli atorluarneqarsinnaasoq, naalakkersuisup aamma oqaatigisimavaa, suliassamut aningaasanik suli immikkoortitsisoqarsimanngisoq.

Inuit Ataqatigiinnit oqaatigineqarpoq, 1500 meteriusunik sanaartornissamik maanna pilersaarutaasoq malinneqarallassasoq, partiimilli mittarfissap takissusissaata allanngortinneqarsinnaanera pillugu partiinik allanik Kommuni Kujallermillu oqaloqateqarnissamut piareersimasoqarpoq.

Siumumit septembarip qaammataata qiteqqunnerani periusissiassat pillugit isumasioqatigiinnermi mittarfissap 1500 meterisut takitiginissaanik piumasaqaat nalilersoqqinneqarniarpoq, partiimulli pingaaruteqarnerarpaat sanaartornerup piaarnerpaamik aallartinneqarnissaa. Siumumit maluginiarneqarsimavoq, nalilersuisimaneq paasissutissanik nutaanik tunniussisimasoq, aamma suliassamut aningaasanik immikkoortitsisoqarsimanngitsoq.

Naleqqap 1500 meterisut takitiginissaa aalajangiussimavaa. Mittarfiup takissusissaa allanngortinneqassappat, Nuummi Ilulissanilu mittarfiit takissusissaat aamma isumaqatiginninniutigeqqinneqartariaqartut, partiimit oqaatigineqarpoq.

Demokraatit mittarfissaq 1500 meteriussasoq piumasaraat, tassani takornariartitsiarneq nunap immikkoortuanik ineriartortitsisinnaaniassammat, timmisartut nunanit tamalaaneersut sapinngisamik Qaqortumukartarnissaat eqqarsaatigalugu.

- Naalakkersuisut sulileramik nunatta ineriartortinneqarneranik kinguarsaallutik aallartissimanerat uggorilluinnarpara, Inatsisartuni ilaasortaq Demokraatillu aaqqissuussaaneranni siulittaasup tullia Nivi Olsen Sermitsiaq.AG-mut oqarpoq.

- Mittarfiup 1199 meterisut takitigisup 1500 meterisut pisinnaasaqarnerank Naalakkersuisut tunngavilersuutaat paasilluarsinnaavakka. Kujataanili takornariartitsisarneq ineriartortinneqassappat, mittarfeqartariaqarpugut Air Greenlandip timmisartuutaanit kisimi pinnani nunanili tamalaani timmisartorsuit miffigisinnaasaannik, taamaalillunimi nunap immikkoortuni takornariartitsisarneq ineriartortinneqarlunilu nunap immikkoortua ineriartortinneqassaat. Piffissaq ungasinnerusoq eqqarsaatigalugu eqqarsarsinnaaneq matumani pineqarpoq, taanna oqarpoq.

Demokraatit naapertorlugit, Naalakkersuisut uranimut naaggaarluinnarneq atuutseqqilerniarlugu siunnersuuteqarnermikkut Kuannersuarni aatsitassarsiorniarneq nunamilu uuliasiorneq unitsimmatikkit, mittarfik 1500 meterisut takitigisoq nunap immikkoortuata ineriartortinneqarnissaanut periarfissatuaalerpoq, Naalakkersuisut unitsitaat namminersulivinnissamut aqqutissiuisussatut isertitaqarfiulluartartussatut naatsorsuutigineqarsimagaluarput.

Qanoq aningaasalersorneqassanersoq nalugaa

Demokraatinit ilisimaarineqarpoq, timmisartoqarfiliorniarnermut aningaasanik nassaarniarneq ajornartuusoq, Nivi Olsenillumi aningaasat suminngaanniit pissarsiarineqarsinnaanersut oqaatigisinnaannginnerarpaa.

- Maanna naalakkersuisuusut atuutsillugit aningaasat isertinneqarsinnaasut annikilliartuinnavipput, naalakkersuisummi periarfissat tamaasa matunikuuaat. Akiitsunik akiliisitsiniartarfik Ilanngaassivik atorunnaarsinneqanngitsuuppat, innuttaasut akiitsuinit en milliard koruuniusut ilaat isertissinnaagaluarpavut, nunallu siunissaanut aningaasaliissutigalugit, demokraatineersoq oqarpoq.

Aningaasaliissuteqartartut tunuartersinnaasut

Nivi Olsenip naggasiullugu oqaatigaa, mittarfiup timmisartunit nunanit tamalaaneersunit miffigineqarsinnaasup naannerulersinneqarnissaanik oqalunneq takornariartitsisarnerup iluani aningaasaliissuteqartartut tunuartertissinnaagai, soorlu. Uranimut naaggaarluinnarnerup aatsitassarsiorniartunut aningaasaliissuteqartartut tunuartertissinnaagai, tamannalu aqqutissaanngitsoq, Demokraatinit oqaatigineqarpoq.

- Soorunami innuttaasut politikkerinik qinersisimanerat ataqqivarput. Pissaanermilli tigusinermik kingorna suliniutissatut taakkartukkamik saniatigut takornariartitsisarnerup ineriartortinneqarsinnaaneranik pilerisunneq annikinnerulersinneqarsimammat ajorluinnarpoq, Nivi Olsen oqarpoq.

inuiagatigiit politikki
Powered by Labrador CMS