Skip to main content

Demokraatit KNR-mut tunngatillugu malittarisassat oqilisikkusuppaat

Demokraatit isumaqarput, KNR nutaarsiassanik aningaasalersorneqarsimasunik aallakaatitsisinnaasariaqarpoq, aningaasaliisimasoq kinaasoq takutinneqarsinnaappat. Siunnersuut Naalakkersuisunit taperserneqarpoq.

KNR-ip aningaasalersorneqarsimasunik nutaarsiassanik maannakkorpiarlu soqutinartunik aallakaatitsisinnaanera inatsisitigut inerteqqutaammat, innuttaasut aallakaatitassiat soqutiginartut nutaarsiassallu annaasinnaavaat. Taamatut isumaqarput Demokraatit Inatsisartuni gruppiat, radiukkut tv-kkullu aallakaatitsisarneq pillugu inatsimmik allannguerusuttut.

Demokraatit KNR-ip inatsimmik unioqqutitsilluni aallakaatitassiarisimasai marluk innersuussutigaat. Tamanna pisimavoq, KNR-ip USA-mut aallakaatitassioriartornerminut atatillugu najugaqarnermut angalanermullu aningaasartuutinik Amerikami nunanut allanut ministeeriaqarfimmit akiliunneqarmat.

KNR-ip aamma Tasiilami aallakaatitassiani peertariaqarsimavaa, angalaneq ilaatigut Kommuneqarfik Sermersuumit aningaasaliiffigineqarsimammat.

Aningaasaliiffigineqarsimasunik nutaarsiassanik maannakkorpiarlu soqutiginartunik aallakaatitsinissamut inerteqquteqarnikkut kiffaanngissuseqarluni aallakaatitsisarnerup qularutigineqarsinnaanera pinngitsoortinneqassaaq.

Aallakaatitassiornissamut periarfissat pitsaanerusut

Demokraatit gruppiannit erseqqissaatigineqarpoq, inatsimmik malinninnissaq pingaaruteqartoq aamma KNR inatsimmik unioqqutitsisimanersoq pillugu naliliisimaneq eqqortuusoq:

- Tamaammallu Demokraatit isumaqarput inatsit allanngortittariaqaripput, taamaalilluni siunissami aallakaatitassianik nutaarsiassanik, maannarpiarlu soqutiginartunik imallit aningaasalersorneqartalersinnaanissaat akuerisaalertissallugu.

- Tamanna KNR-mut aallakaatitsisartussanullu allanut aallakaatitassanik pitsaasunik tamatsinnullu iluaqutaasussanik aallakaatitsisarnissaannut aqqutissiuussissaaq, Demokraatit Inatsisartuni gruppiat siunnersuummut tunngavilersuilluni allappoq.

Aningaasaliissuteqarsimasoq ilisimatinneqassasoq

Naalakkersuisut Demokraatit siunnersuutaannut isumaqataapput, inassutigalugulu siunnersuut akuerineqassasoq:

- Siunnersuuteqartup erseqqissarsimavaa nutaarsiassat massakkullu pisunut aallakaatitassiortarnerit aningaasaliiffiginissaannut inerteqquteqartitsinerup atorunnaarnissaa pillugu siunnersuuteqarnermi piumasarineqassasoq aallakaatitassiap aallartinnissaa sioqqullugu aallakaatitassiap kimit aningaasalersorneqarnera paasissutissiissutigineqartassasoq, apeqqutaanani aningaasaliinermi suna tunngavigineqarnersoq siunertaanersorluunniit.

- Naalakkersuisut isumaqataapput tamanna ammasumik ingerlatsinermik malitseqarumaartoq taamatullu inatsimmi maanna atuuttumi mianerisassanut naammassinnittoqarsinnaassalluni, Ilinniartitaanermut, Kultureqarnermut Ilageeqarnermullu Naalakkersuisoq Demokraatit siunnersuutaannut akissuteqarluni allappoq.

Inatsisartut siunnersuut pingasunngorpat siullermeerlugu suliarissavaat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER