Demokraatit killersuutinik atorunnaarsitsinissamut piareeqqasut

Demokraatit siulittaasuat inuiaqatigiit ammaqqinneqarnissaannut piareeqqavoq, isumaqarlunilu Omikroni inuiaqatigiinnut ulorianartorsiortitsinngitsoq. Tunngavilersuutaali partiit allat siulittaasuinit isumaqatigineqanngitsut, taanna oqarpoq.

”Kiffaanngissuseqarnerput uterfigeqqitsigu”

Naalakkersuisut nunami maani killilersuutinik sukaterinerisa aamma kommunini pingasuni imigassamik tunisaqartarnermik sassaallertarnermillu inerteqquteqalernerisa aqanguani, Demokraatit siulittaasuat Jens-Frederik Nielsen taamak erseqqitsigisumik oqarpoq.

Sverigemi februaarip qulingiluaat aallarnerfigalugu coronsmut killilersuutinik atorunnaarsitsiartuaartoqalissaaq, Hollandimilu killilersuutit sukangasut qasukkaaffigineqarlutik. Nunat arlallit Omikroni tuniluukkaluaqisoq kiffaanngissuseqarnerulernissamik suliniuteqarput.

Danmarkimilu naalakkersuisut killilersuutinik februaarip aallaqqaataaniit killilersuutinik tamanik atorunnaarsitsinissaat naatsorsuutigineqarpoq. Mette Frederiksen pingasunngornermi danskit nalunaaqutaat malillugu ualikkut arfineq-marlup qeqqanut tusagassiortunik katersortitsiniarpoq, tassani Covid-19 ”inuiaqatigiinnut ulorianartorsiortitsisutut” suli isigineqarnersoq pillugu nalunaaruteqartoqassaluni.

Kiffaanngissuseqarneq uterteqqinneqartariaqalersoq

Tamanna corona ukiut pingasut matuma siornatigut atuutilermat misigisimasatsitut killilersuuterpassuarnik pilersitsisuusimavoq.

- Pissutsit takutippaat Omikron nappaat inuiaqatigiinni navianartorsiortitsinngitsoq. Taamaattumik Demokraatit tungaaniit isumaqarpugut kiffaanngissusitta uterteqqinnissaa piffissanngortoq, Jens-Frederik Nielsen pingasunngornermi tusagassiorfinnut nalunaaruteqarluni allappoq.

Nunani allani arlalinni ammaaqqinnerit omikronillu napparsimarujussuartitsinnginnerusarnera tunngavilersuutigai.

- Tamanna tunngavigalugu maani nunatsinni ulluinnaat uterteqqikkiartuaarnissai piffissanngorsoraara. Tamanna soorunami aamma partiit siuttuisa naapinnerini tunngavilersuutigisarsimavara, oqalliffilli taanna oqariartuutinik apuussiffigiuminaassimavoq.

Corona pillugu suleqatigiilluarsimasut

Partiimi siulittaasup oqaatigaa, Inatsisartuni nappaalanerup pakkersimaarnissaanut suleqatigiilluartoqarsimasoq, Demokraatilli naammaginnilersut.

- Ersarissumillu tamanna oqaatigissavara; Omikron peqqutigalugu inuiaqatigiinni corona navianartorsiortitsiunnaarpoq. Demokraatillu nunatsinni killilersuinerit peqataaffigisinnaajunnaarpai. Unitsinniartigit. Kiffaanngissuserput inuunerullu nuannertui uterfigeqqinniartigit.

Jens-Frederik Nielsenipaamma Naalakkersuisut arriipallaamik sulinerarlugit, partiillu siulittaasuisa isumaqatigiissutaannik atuutsitsisannginnerarlugit isornartorsiorpai.

- Tassunga assersuutissaqqissuuvoq, Naalakkersuisut akuerineqarsinnaanngitsumik inuussutissarsiornerup mattunneqarnissaanik sulisimanerat.

Demokraatit siulittaasuata oqaatigaa, partiit siulittaasuisa isumaqatigiissutigisimagaat, inuussutissarsiortut 100 procentimik taarsiiffigineqarnissaat.

- Taamaattorli tukattorujussuarmut killissimapput, taarsiissut 100%-iusimanngilaq, inuussutissarsiortunullu taarsiissuteqarniarnerit suli iluamik aallartisarsimanatik.

100 procentimik taarsiissuteqartoqarsimanngitsoq

Kalaallit Nunaanni Sulisitsisut Nusukallu inuussutissarsiortunut killilersuutinik sulisullu napparsimanerannik ilungersuuteqartunut tapiissuteqartoqartannginnera isornartorsiorsimmavaat.

- Tassunga Naalakkersuisut piumaffigissavakka asuli tukattumik ingerlajunnaassasut; Partiit siuttuilu isumaqatigiissuteqarnerput naapertorlugu inuussutissarsiortut 100%-mik taarsiiffigineqassapput. Tamannalu sukkanerusinnanngitsumik pissaaq, Jens-Frederik Nielsenip oqariartuutini naggaserlugit oqaatigaa.

Inuussutissarsiornermu Niuernermullu Naalakkersuisup Pele Brobergip Demokraatit pakatsisimanerat paasisinnaanerarpaa.

- Naalakkersuisut killilersuutinik atuutsitsilerpata, eqqugaasut soorunami taarsiiffigineqartussaapput, tamannalumi partiit siulittaasuinit isumaqatigiissutaavoq. Uagulli siusinnerusukkullu naalakkersuisooqatigiissimasut inuussutissarsiortunut 10 procentimik taarsiissuteqarsinnaasarsimanngilagut.

Powered by Labrador CMS