Demokraatit isumaqatiginninniarnissamut oqimaalutaaratarsinnaanermullu piareersarput
Demokraatit kissaatigisaattut ingerlasoqassanngppat, tassalu ukiut 40-ngajaat ”aappaluttut” ingerlarsisimanerannik mumisitsilluni partiillu kiffaanngissutsimik pingaartitsisut aqutsinissamik periarfissiisoqassanngippat, tamatuma malitsigisaanik naalakkersuisunik pilersitsiniarluni isumaqatigiinniarnissanut piumasaqaatissat ilusilersuleruttorpaat.
Demokraatit siulittaasuata Randi Vestergaard Evaldsenip qinersisartut qinnuigai aappaluttunik aqutsisoqarluni naalakkersuinikkut ingerlatseriaaseq allanngortinneqaqqullugu. Taamaattorli partiit talerperliunerusut iluaqutissaannik angusaqarniarnissaq unamminartortaqassannguatsiarpoq, isumasiuinerit kingulliit angusaajumaartussanut piviusorsiussappata. Aamma Demokraatit isumasiuinerup siulianut sanilliullugu siuariaraluarpataluunniit.
Taamaattorli suulluunniit pisinnaapput, isumasiuisoqaraluarpalluunniit aamma qinersinerup inernera allarluinnaasinnaammat. Randi V. Evaldsen aperaarput, naalakkersuisooqatigiilerniarluni isumaqatigiinniarnerni siuttunngussagaluarunik imaluunniit peqataassagaluarunik;
- Siullermik sulissutigineqassaaq akileraarutip appartinneqarnissaa, taamaaliornikkut innuttaasut kaasarfimmioqarnerulernissaat taamaalillutillu kiffaanngissuseqarnerulernissaat anguniarneqarsinnaammat. Aappassaanik Nammimersorlutik Oqartussat aaqqissuussaanerat allanngortiterneqassaaq. Allaffissorneq annikillisarneqassaaq taamaaliornikkullu innuttaasut toqqaannartumik sullinneqarnerat annertusarneqassalluni, soorlu assersuutigiinnarlugu peqqinnissaqarfimmi allaffissorneq millisinneqarpat innuttaasut peqqinnissap tungaatigut sullinneqarnissaat annertusitissavarput, Randi V. Evaldsen akivoq(D)
Namminiilivinnissamut kinguaariit ataatsit missaat ingerlareerpata pissaaq
Partiit tamangajammik, Suleqatigiissitsisut eqqaassanngikkaanni namminiilivikkusupput, taamaattorli piffissaq suleriarnissarlu pillugit assigiinngitsunik ingerlariaaseqartoqarusuppoq.
- Demokraatit namminiilivikkusupput, taamaattorli periaaseq allanngortinneqartariaqartoq partii isumaqarpoq: Tunngaviusumik inatsisissamut piareersaatit unitsinneqassapput, aatsaallu assingusumik aallartitsisoqassaaq inuaqatigiit piareerpata, Randi Vestergaard Evaldsen erseqqissaavoq.
Atassut Demokratillu apeqqummut isumaqatigiipput, Siumup tunngaviusumik inatsisissamik piareersaaneq ingerlatiinnarusukkaa Kim Kielsen erseqqissaavoq. Siusinnerusukkut Inuit Ataqatigiit sinnerlugit Sara Olsvig kissaateqarpoq suliaq Naalakkersuisut Siulittaasuata ataaniitinneqalissasoq, Partii Naleraq 2021-mi nunarput naalagaaffinngortinneqassasoq suaaruteqarnikuuvoq, taamaammallu apeqqummut namminiilivinnissamut tunngatillugu soorluuna Partii Naleraq aammalu Demokraatit tamanna pillugu naapissinnaanissaminnut periarfissaat annikitsuararsuusut, Partii Nunatta Qitornai ullumikkut atugassarititaasunik aaqqqissuussisoqaqqaassasoq kissaateqarnerarlugu partiip siulittaasua Vittus Qujaukitsoq erseqqissaateqarportaaq.
Eqqumaffigisassaq (aaqqissuisoqarfik)
Suleqatigiinniarluni oqaloqatigiinnerit allat aamma pisinnaapput taamaalillutillu Demokraatit illuatungiliuttunngoratarsinnaallutik, tassunga apeqqutaassaaq partiinut arfineq marluusunut innuttaasut taasinerminnik qanoq agguaassinersut.