Demokraatit Inuusuttaat siulersuisortaartut

Ernst Bo Frederiksen Demokraatit Inuusuttaasa kattuffiani siulittaasunngorpoq.

Demokraatit Inuusuttai juunip tallimaani ataatsimeersuarput, ippassarlu marlunngornermi siulersuisunngortut inissiterneqarput.

Demokraatit Inuusuttaat tusagassiuutinut taama nalunaaruteqarput.

Siulersuisunngortut, ilinniartitaaneq, akileraartarneq pinaveersaartitsinerlu siulersuisutut atuunnerminni immikkut sammerusuppaat.

- Uagut partiit kajumissaarusuppagut akileraarutit apparneqarnissaannut. Nunarsuarmi niuerfiusumi unammillerluarsinnaasariaqarpugut, taamaattumik sutigut tamatigut eqaallisaanissamut piumassuseqartariaqarpugut, nunarput aningaasaliivigissallugu niuerfigissallugulu pilerinartuussaappat, siulittaasunngortoq tusagassiuutinut nalunaarummi taama oqarpoq.

Takornariaqarneq aatsitassallu

Ernst Bo Frederiksenip aalisakkerinermut ilinniartoqarsinnaalernissaa periarfissaasariaqartoq erseqqissarpaa.

- Aalisakkanik inuussutissarsiornermik isumalluuteqarpallaarpugut. Taamaammat politikkerit kajumissarusuppagut takornariaqarnermi ataatsitassarsiornermilu iliuseqarnerusariaqartut, siunissami qaninnermi taakku itisilerlugu uagut tungitsinniit
sammiumaarpagut, kisianni oqaatigereersinnaavarput suliaminnik ilisimasalinnik politikkerit suleqateqarnerusariaqarmata, Ernst Bo Frederiksen oqarpoq.

Nadia Olsen Demokraatit Inuusuttaani siulittaasup tulliatut qinigaavoq, Manasse Berthelsen allatsitut, Nukakkuluk Karl Ove Kristensen aningaaserisutut kiisalu Malene Vahl Rasmussen siulersuisuni ilaasortanngorluni.