ammanerulersitsineq
Demokraatit Inuusuttaasa Siumut sangujoraarnerarpaa
Anders Olsenip Siumumeersup ammanerulersitsinissamut tapersersuiutigaluni akerliunera, peqatigiiffiup tupigusuutigaa
Siumup Inatsisartunut ilaasortaatitaa, Anders Olsen, kisermaassinermut tunngatillugu qanoruna isumaqartoq?
Politkeri AG-imi kisermaassisussaatitaanerup ullui qaangiunnerarlugit issuarneqarnerata kingorna, apeqqut taanna Demokraatit Inuusuttaasa qaqippaat.
Isumaqatigiittut
- Demokraatit Inuusuttaasa tamanna isumaqatigaat, kisiannili eqqumiigaarput, sooq Anders Olsen Siumullu Tele-Postimi mobiilikkut niuernermi kisermaassisoqarnissaa anguniartigineraat, peqatigiiffik tusagassiuutinut nalunaarummi naqissusiivoq.
Inuusuttut peqatigiiffiata tikkuarpaa, Inatsisartut upernaaq 2016 ataatsimiinneranni Siumut Inuit Ataqatigiillu ataatsimoorullugu Tele-Postimi mobiilikkut niuerneq kisermaanneqarnissaa anguniarpaat. Inatsisartunut ilaasortaq Anders Olsen ataatsimoorluni aaliangiinermi peqataavoq, Demokraatit Inuusuttaat erseqqissaapput.
Qaammatit marluk qaangiuttut
- Taamaattumik Demokraatit Inuusuttaasa tupaallaatigaat Anders Olsen kisermaassinissamut aaqqiisarnerit qanganngorsimaneranik issuarneqarsimammat. Piffissaq Anders Olsenimut sukkasimaqaaq. Qaammatit marluk qaangiutiinnarput nunatsinnut pingaaruteqartumik Tele-Post kisermaassiinnarnissaa aaliangerneqarmat, taakku tikkuaapput.
Demokraatit Inuusuttaasa illuanik naqissuserpaat, unammilleqatigiinneq piffinni tamani atuutsikkusullugu, puukunik utertitsineruppat, telekkut nioqqutaappata, nioqqutit ulluinnarsiutaappata immaqaluunniit allarluinnaagaluarpata.
- Unammilleqatigiilluinnarnermi pisisartunut nioqqutinik pitsaanerusunik akikinnerusunillu pilersitsisoqartarpoq, taama tunngavilersuipput.